Алматыда «Школьник» тұрғын үй кооперативінің төрағасы Василий Наумов кооперативке тиесілі жер телімдерін заңсыз сатқаны үшін бес жылға бас бостандығынан айырылды, деп хабарлайды dalanews.kz.
Бұл туралы журналист Михаил Козачков жазды.
Журналистің мәліметінше, «Школьник» кооперативі шамамен 30 жыл бұрын құрылған. Оны Ауған соғысының ардагері Василий Наумов басқарған. Ол бұған дейін шаруашылықты тиімді ұйымдастыратын басшы ретінде танылып, бұқаралық ақпарат құралдарына сұхбат берген. Алайда жағдай 2025 жылы өзгерген. Алматыдағы Ақсай-1А шағынауданындағы бірнеше үйдің тұрғындары кооперативке тиесілі бос жатқан жер телімінің құрылыс жұмыстары үшін қоршалғанын байқаған.
Бұл жер учаскесі кооператив құрамына кірген бес көпқабатты үймен бірге оның меншігіне өткен. Аумағы шамамен екі гектар болатын бос жерді қалай пайдалануға болатынын тұрғындар бірнеше жыл бойы шеше алмаған. Журналистің жазуынша, тұрғындар жерді сатуға ешкімге рұқсат бермеген.
Осыдан кейін олар құрылысқа кімнің рұқсат бергенін анықтау үшін Алматы қаласының прокуратурасына жүгінген. Прокуратура жер қатынастары саласындағы жауапты органдарға кооперативке тиесілі аумақтың қалайша жеке меншікке өткенін тексеруді тапсырған.
Жер учаскелері қалай сатылған?
Тексеру барысында жердің жеке меншікке Василий Наумовтың әрекеттерінен кейін өткені анықталған. Оның атынан жалпы жиналыстың хаттамасы рәсімделіп, бастапқы жер телімі үш бөлікке бөлінген. Кейін олардың екеуі сатылған. Михаил Козачковтың мәліметінше, бұл іске Наумовтың күйеу баласы да көмектескен. Сатылған жер учаскелерінің бірін оның қызы, екіншісін досы сатып алған.
Прокуратура өкілдері кооператив тұрғындарынан жауап алған кезде, олардың ешқайсысы жердің тағдыры талқыланған жиналысқа қатыспағанын және хаттамаға қол қоймағанын айтқан. Осылайша, жерді бөлуге және сатуға негіз болған құжаттың қолдан жасалғаны анықталған. Осы жағдайдан кейін Василий Наумовқа алаяқтық жасады деген айып тағылған.
Сот қандай шешім шығарды?
Сот отырысында Наумов өз әрекетін кооперативтің мүддесі үшін жасағанын айтқан. Алайда журналистің хабарлауынша, ол жер телімдері үшін ақшаны өзі алғанын айтпаған. Алматы қалалық соты Наумовты кінәлі деп танып, жалпы режимдегі колонияда бес жылға бас бостандығынан айыру туралы үкім шығарған. Үкім заңды күшіне енген.
Сонымен қатар жер учаскелеріне салынған тыйым азаматтық тәртіппен қаралатын даулар аяқталғанға дейін сақталған.
