Алматы тауларында ер адам жартастың үстінде тепе-теңдігін ұстай алмай, сайға құлап кеткен. Төтенше жағдайлар министрлігінің құтқарушылары оған алғашқы медициналық көмек көрсетіп, таудан эвакуациялады, деп хабарлайды dalanews.kz.
Оқиға Алматы облысы Қарасай ауданындағы Терра алаңы маңында, теңіз деңгейінен 2610 метр биікте болған. Ер адам құлағаннан кейін ес-түссіз жатқан.
Оқиға орнына Қазақстан ТЖМ Республикалық жедел құтқару жасағының "Барыс" құтқарушылары және Алматы әкімдігінің Мониторинг және жедел ден қою орталығының қызметкерлері жіберілген. Құтқарушылар Проходное шатқалы арқылы таулы бағытпен жаяу жетуге мәжбүр болған.
Олар зардап шеккен ер адамды сайдан тауып, бірден алғашқы медициналық көмек көрсеткен.
Құлаған кезде ер адам тасқа соғылып, басынан жарақат алған. Құтқарушылар оны таулы аймақтан қауіпсіз жерге шығарып, медицина қызметкерлеріне тапсырған.
Кейін зардап шеккен адам одан әрі тексеріліп, медициналық көмек алу үшін №12 қалалық клиникалық ауруханаға жеткізілген.
