Мегаполис әкімі Бақытжан Сағынтаев Кеңестің қаланың көлік инфрақұрылымын дамыту және Vision Zero Almaty тұжырымдамасы аясында жол қауіпсіздігін қамтамасыз етудің өзекті мәселелері бойынша нақтылы шешімдерді талқылап, қабылдаудың диалог алаңына айналатынын атап өтті. Кеңес құрамына осы саланың сарапшылары, белсенді қоғам белсенділері, кәсіпорындардың басшылары мүше болды.
Кеңес қаланың көлік инфрақұрылымын жетілдіру бойынша ұсыныстар әзірлейді әрі олардың жүзеге асуына мониторинг жүргізеді және баға береді, оның ішінде көлік саласындағы МЖӘ жобаларын бақылайды, сондай-ақ көлік саласында туындаған қоғамдық мәселелер бойынша консультативті көмек көрсетеді.
Бақытжан Сағынтаев Кеңес мүшелері әрқайсысының жолаушылар тасымалының сапасын арттыруға, жол қозғалысына қатысушылардың қауіпсіздігіне және қаланың көлік жүйесін дамытудың кешенді жоспарын жетілдіруге өз үлестерін қосатынындарына сенім білдірді.
Алғашқы кездесу барысында жолаушылар тасымалының сапасы, жол инфрақұрылымының қауіпсіздік стандарттарына сәйкестігі, Алматының Бас жоспарындағы көлік бөлімінің мәртебесі туралы мәселелер көтерілді. Сәтбаев көшесі бойымен Щепетков көшесінен Манас көшесіне дейінгі велосипед қозғалысын ұйымдастыру жобасы жеке қаралды.
