Алматыда Бостандық ауданында әрқайсысы 500 адам қабылдай алатын екі жаңа емхана салынады. Бұл туралы Алматы әкімі Ерболат Досаев аудан тұрғындарымен кездесуінде айтты, - деп хабарлайды Dalanews.kz
Бірінші емхананың құрылысы Серкебаев даңғылы мен Левитан көшесінің қиылысында басталып кетті. Оны қараша айында аяқтау жоспарланған.
Екінші емхананың құрылысы маусым айында Әл-Фараби даңғылы мен Санаторий көшесінің қиылысында мемлекеттік сараптама мақұлданған соң басталады.
Екі емхана да заманауи стандарттарға сай болады. Оларда КТ және МРТ аппараттарымен жабдықталған клиникалық-диагностикалық орталықтар қарастырылған.
Перинатология және балалар кардиохирургиясы орталығының емханасында күрделі жөндеу аяқталды — қазір онда жайлы жағдай жасалып, заманауи құрал-жабдықтар орнатылған.
Қазіргі таңда күрделі жөндеудің соңғы кезеңінде:
- № 4 емхананың филиалы (Орбита-2 ш/а., 29А);
- № 12 емхана (Попов көшесі, 23) — жұмыстың 90%-ы аяқталды, нысан көктемде пайдалануға беріледі.
Аудан тұрғындары үшін медициналық қызметтердің қолжетімділігі мен сапасын жақсарту жұмыстары жалғасуда.
