Алматы облысында жол апатынан жеті адам қаза тапты. Олардың бесеуі спортшы, деп хабарлайды Dalanews.kz.

Бұл туралы Ұлттық сурдлимпиялық комитеттің вице-президенті және Жол қозғалысы қауіпсіздігі қауымдастығының басшысы Арсен Шакуов хабарлады. Оның сөзінше, бүгін түнде футболдан есту қабілеті нашар ардагерлер турнирінен оралған ардагерлер жол апатына ұшырап, сол жерден 5 спорт ардагері қаза тапқан.

Сонымен қатар, жүргізуші мен тағы бір жолаушы қайтыс болды.

Арсен Шакуов қаза тапқан спортшылардың есімін атады. 

• Асыл Ибраимов – есту қабілеті төмен спортшылар арасындағы футбол жаттықтырушысы.

• Дмитрий Мочальский – шахматтан Сурдлимпиада чемпионы, есту қабілеті төмен спортшылар арасындағы Еуропа чемпионы.

• Сәкен Смағұлов – есту қабілеті төмен футбол ардагері, ұлттық құраманың мүшесі.

• Сергей Волковинский – есту қабілеті төмен футбол ардагері, ұлттық құраманың мүшесі.

• Серік Молдашев – есту қабілеті төмен футбол ардагері, ұлттық құраманың мүшесі.

"Барлығының артында балалары мен немерелері қалды. Мен оларды бала кезімнен жеке білемін, бәрі әкемнің ең жақын достары еді", - дейді Арсен Шакуов. 

Еске салайық, қайғылы оқиға туралы бүгін таңертең хабарлаған едік.