Бүгін Қазақстан Республикасының Орталық сайлау комиссиясы «Әділет» партиясының Құрылтай депутаттарының сайлауына қатысатын кандидаттар тізімін тіркеді, деп хабарлайды dalanews.kz.
Партия сайлауға 186 кандидат ұсынды.
Кандидаттардың орташа жасы – 45. Олардың қатарында заңгерлер, ғалымдар, кәсіпкерлер, сондай-ақ білім беру, денсаулық сақтау, цифрландыру, ауыл шаруашылығы, өнеркәсіп, мәдениет және қоғамдық қызмет салаларының өкілдері бар.
Дереккөзге сүйенсек, «Әділет» партиясы сайлауға заң үстемдігі, әділдік және жауапкершілік қағидаттарына негізделген бағдарламамен қатысады. Бағдарламада цифрлық трансформация, кәсіпкерлікті дамыту, мемлекеттік қызметтердің сапасын арттыру және тиімді мемлекеттік басқару мәселелеріне басымдық берілген.
Айта кетейік, «Әділет» партиясы 2026 жылғы 1 маусымда тіркелген. Осылайша, партия Құрылтай депутаттарының сайлауына алғаш рет қатысады.
