«Әділет» партиясы цифрландыру мен жасанды интеллектті (ЖИ) елді дамытудың негізгі бағыттарының бірі ретінде қарастырады. Бұл туралы партияның кезектен тыс съезінде Бағдат Мусин мәлімдеді, деп хабарлайды dalanews.kz.
Оның айтуынша, цифрландыру мемлекеттік басқарудың барлық саласын қамтуы тиіс.
«Біз “ауырып ем іздегенше, ауырмайтын жол ізде” деген халық даналығын ұстанамыз. Яғни жемқорлық фактісі болғаннан кейін оның салдарымен күреспей, оның алдын алуға жұмыс істеуіміз керек», – деді Бағдат Мусин.
Ол цифрландырудағы ең маңыздысы технология емес, мемлекеттік органдар басшыларының өзгеріске дайындығы мен процестердің ашықтығы екенін айтты.
Мысал ретінде ол бұрын бірнеше күнге созылатын көлікті тіркеу қызметінің бүгінде бес минутта көрсетілетінін келтірді.
Сондай-ақ партия мемлекеттік қызметтерді жетілдіру бойынша ұсыныстарды өз платформасы арқылы жинауды жоспарлап отыр.
Мусиннің сөзінше, «Халық үніне құлақ асатын мемлекет» тұжырымдамасын дамыту аясында e-Өтініш платформасына жасанды интеллект құралдарын енгізу көзделген.
«Жасанды интеллект еліміздің қай өңірінде қандай мәселе барын, қай елді мекендерде бірінші кезекте шешілуі тиіс проблемалар бар екенін талдауға көмектеседі», – деді ол.
Бұдан бөлек, партия елдің барлық өңірін сапалы интернетпен қамтамасыз етуді, азаматтарды жасанды интеллект дәуіріне бейімдеуді және AIsana бағдарламасы арқылы цифрлық дағдыларды дамытуды ұсынады.
Сонымен қатар Бағдат Мусин Қазақстанда халықаралық технологиялық компанияларды тарту үшін дата-орталықтар алқабын құру қажет екенін айтты.
«Цифрлық даму – бұл тек технология мәселесі емес. Бұл алдағы жылдары Қазақстанның қандай мемлекет болатынын және өз болашағымызды өзіміз айқындай алатынымызды шешетін маңызды бағыт», – деді ол.
Оның пікірінше, цифрлық трансформация азаматтар мен бизнестің өмірін жеңілдетіп, мемлекеттік қызметтердің тиімділігін арттыруы тиіс.
