«Ádilet» partiiasy tsifrlandyrý men jasandy intellektti (JI) eldi damytýdyń negizgi baǵyttarynyń biri retinde qarastyrady. Bul týraly partiianyń kezekten tys sezinde Baǵdat Mýsin málimdedi, dep habarlaidy dalanews.kz.
Onyń aitýynsha, tsifrlandyrý memlekettik basqarýdyń barlyq salasyn qamtýy tiis.
«Biz “aýyryp em izdegenshe, aýyrmaityn jol izde” degen halyq danalyǵyn ustanamyz. Iaǵni jemqorlyq faktisi bolǵannan keiin onyń saldarymen kúrespei, onyń aldyn alýǵa jumys isteýimiz kerek», – dedi Baǵdat Mýsin.
Ol tsifrlandyrýdaǵy eń mańyzdysy tehnologiia emes, memlekettik organdar basshylarynyń ózgeriske daiyndyǵy men protsesterdiń ashyqtyǵy ekenin aitty.
Mysal retinde ol buryn birneshe kúnge sozylatyn kólikti tirkeý qyzmetiniń búginde bes minýtta kórsetiletinin keltirdi.
Sondai-aq partiia memlekettik qyzmetterdi jetildirý boiynsha usynystardy óz platformasy arqyly jinaýdy josparlap otyr.
Mýsinniń sózinshe, «Halyq únine qulaq asatyn memleket» tujyrymdamasyn damytý aiasynda e-Ótinish platformasyna jasandy intellekt quraldaryn engizý kózdelgen.
«Jasandy intellekt elimizdiń qai óńirinde qandai másele baryn, qai eldi mekenderde birinshi kezekte sheshilýi tiis problemalar bar ekenin taldaýǵa kómektesedi», – dedi ol.
Budan bólek, partiia eldiń barlyq óńirin sapaly internetpen qamtamasyz etýdi, azamattardy jasandy intellekt dáýirine beiimdeýdi jáne AIsana baǵdarlamasy arqyly tsifrlyq daǵdylardy damytýdy usynady.
Sonymen qatar Baǵdat Mýsin Qazaqstanda halyqaralyq tehnologiialyq kompaniialardy tartý úshin data-ortalyqtar alqabyn qurý qajet ekenin aitty.
«Tsifrlyq damý – bul tek tehnologiia máselesi emes. Bul aldaǵy jyldary Qazaqstannyń qandai memleket bolatynyn jáne óz bolashaǵymyzdy ózimiz aiqyndai alatynymyzdy sheshetin mańyzdy baǵyt», – dedi ol.
Onyń pikirinshe, tsifrlyq transformatsiia azamattar men biznestiń ómirin jeńildetip, memlekettik qyzmetterdiń tiimdiligin arttyrýy tiis.
