Қазақстан футбол федерациясының (ҚФФ) бұрынғы президенті Әділет Барменқұловқа қатысты тергеу жүріп жатыр. Алайда ол әзірге күдікті деп танылған жоқ. Бұл туралы Қаржы мониторингі агенттігі (ҚМА) төрағасының орынбасары Жеңіс Елемесов мәлімдеді, деп хабарлайды Dalanews.kz.

“Қазақстан футбол федерациясына қатысты ұрлық фактісі бойынша қылмыстық іс бар. Алайда қазіргі таңда Барменқұлов күдікті ретінде танылған жоқ. Оған қандай да бір айыптау бойынша құқықтық баға әлі берілмеді”, – деді Елемесов.

Айта кетейік, 4 наурызда ҚМА баспасөз қызметі ҚФФ-ның бұрынғы басшылығына қатысты сотқа дейінгі тергеу басталғанын хабарлаған болатын.

Бұған дейін КазТАГ ҚФФ президенті Барменқұловқа қатысты даудың халықаралық деңгейге шығуы мүмкін екенін жазған. 13 шілдеде оның УЕФА тарапынан тергеліп жатқаны туралы ақпарат тарады.

8 қарашада Барменқұловтың ҚФФ басшылығынан кететіні туралы хабарлама жарияланды. Кейінірек оның командасымен бірге “Қазақмыс” корпорациясынан шыққан өзге де шенеуніктер қызметтен кеткені белгілі болды. Сол күні кешке Қазақстан футбол федерациясы ресми түрде Барменқұловтың отставкаға кеткенін растады.

13 қарашада Абай облысының ҚФФ-дағы мүшелігі уақытша тоқтатылды.