Абай облысында жыл басынан 233,8 мың шаршы метр тұрғын үй пайдалануға берілді

Dalanews 23 қар. 2023 11:29 115

Абай облысында 2030 жылға дейін халық табысын арттырудың өңірлік бағдарламасы қабылданғанын Астана қаласындағы Орталық Коммуникациялар қызметінің баспасөз мәслихатында облыс әкімі Нұрлан Ұранхаев мәлем етті, – деп хабарлайды Dalanews.kz

Жыл басынан бері облыс бойынша 4651 отбасы атаулы әлеуметтік көмек алса, оның ішінде 1847-сі көп балалы отбасы.

Сонымен қатар өңірде кәсіпкерлікті дамыту аясында жастарға 2,5% шағын несие беру жұмысы да басталды. Мәселен, 211 шағын несие беріліп, 207 шағын несие төленді.

Президент тапсырмасымен мүгедектігі бар адамдарға арналған 150 орындық заманауи оңалту орталығы ашылған. Облыста 24 481 мүгедектігі бар адам тұрады. Оның 2 905-і – балалар. Бұдан бөлек, оңалту шараларын арттыру және одан әрі бейімдеу, өмір сүру сапасын жақсарту үшін Семей мен Аягөзде 150 орындық екі орталық салу жоспарланған.


Халықтың әлеуметтік осал тобының тұрғын үй мәселесін шешу үшін жеке тұрғын үй қорынан жалға берілетін тұрғын үй үшін 50% өтемақы төлеуге бюджеттен 865 миллион теңге бөлінді.

Сонымен қатар, биыл Абай облысында жалпы ауданы 480 мың шаршы метрді құрайтын 68 көппәтерлі және жеке тұрғын үйдің құрылысы жүргізілуде, оның 343,1 мың шаршы метрі пайдалануға беріледі.  Осылайша баспанаға мұқтаж 2443 отбасы тұрғын үймен қамтамасыз етілген.

2026 жылға қарай тағы 148 көпқабатты тұрғын үйді пайдалануға беру жоспарлануда. Бұл шара 6800 отбасына жеке баспана сатып алуға мүмкіндік береді.

Айта кетсек, жыл басынан бері 233,8 мың шаршы метр тұрғын үй пайдалануға берілген. Облыста 19 мыңнан астам адам баспана кезегінде тұр, оның ішінде 2442 адам көпбалалы отбасылар.

Ұсынылған
Соңғы жаңалықтар