Алматыда жантүршігерлік жол апатынан бүлдіршін көз жұмды. Жүк көлігі қаққан 7 жасар Айзеренің туыстары автобус жүргізушісі де жазалануын талап етіп отыр", – деп хабарлайды Dalanews.kz.

"Автобус жүргізушісі жазалануын сұраймыз. Ол өліммен аяқталған жол апатына себеп болды. Қатты жылдамдықпен жүйткіп келе жатқанынан бала қорқып, артқа қарай шегінді. Соның кесірінен қарындасым қаза тапты", - деген марқұмның туысы Шухрат Ментеевтің сөзін "КТК" арнасы келтірді.

Мәліметке сүйенсек, жүк көлігінің 66 жастағы жүргізушісі қамауға алынды. Ал әзірге автобус жүргізушісіне айып тағылған жоқ.

"Қылмыстық іс аясында бір емес, бірнеше сараптамалық зерттеу, соның ішінде сот автотехникалық, сот медициналық сараптама тағайындалды. Оқиғаға қатысы бар болуы мүмкін тұлғалар анықталып, әрқайсының іс-әрекетіне құқықтық баға беріледі", - деді Алматы ПД өкілі.

Жергілікті тұрғындар мұнда бұған дейін талай бала қыршын кеткенін айтады. Қаншама адам опат болса да, әлі бағдаршам орнатылмаған. Халық бірнеше жылдан бері елді мекенді жарып өтетін жолға бағдаршам орнатып беруді сұрап жүр. Алайда құлақ асқан жан болмаған.

Айзере отбасындағы төрт баланың үшіншісі болған. Екі әпкесі мен інісі бар екен. Тірі болғанда үш аптадан соң 8 жасқа толар еді.