Almatyda jantúrshigerlik jol apatynan búldirshin kóz jumdy. Júk kóligi qaqqan 7 jasar Aizereniń týystary avtobýs júrgizýshisi de jazalanýyn talap etip otyr", – dep habarlaidy Dalanews.kz.
"Avtobýs júrgizýshisi jazalanýyn suraimyz. Ol ólimmen aiaqtalǵan jol apatyna sebep boldy. Qatty jyldamdyqpen júitkip kele jatqanynan bala qorqyp, artqa qarai shegindi. Sonyń kesirinen qaryndasym qaza tapty", - degen marqumnyń týysy Shýhrat Menteevtiń sózin "KTK" arnasy keltirdi.
Málimetke súiensek, júk kóliginiń 66 jastaǵy júrgizýshisi qamaýǵa alyndy. Al ázirge avtobýs júrgizýshisine aiyp taǵylǵan joq.
"Qylmystyq is aiasynda bir emes, birneshe saraptamalyq zertteý, sonyń ishinde sot avtotehnikalyq, sot meditsinalyq saraptama taǵaiyndaldy. Oqiǵaǵa qatysy bar bolýy múmkin tulǵalar anyqtalyp, árqaisynyń is-áreketine quqyqtyq baǵa beriledi", - dedi Almaty PD ókili.
Jergilikti turǵyndar munda buǵan deiin talai bala qyrshyn ketkenin aitady. Qanshama adam opat bolsa da, áli baǵdarsham ornatylmaǵan. Halyq birneshe jyldan beri eldi mekendi jaryp ótetin jolǵa baǵdarsham ornatyp berýdi surap júr. Alaida qulaq asqan jan bolmaǵan.
Aizere otbasyndaǵy tórt balanyń úshinshisi bolǵan. Eki ápkesi men inisi bar eken. Tiri bolǵanda úsh aptadan soń 8 jasqa tolar edi.
