Солтүстік Қазақстан облысы елдегі ең жоғары даму қарқынын көрсетіп отырған өңірлердің бірі. Бұл туралы Орталық коммуникациялар қызметіндегі брифингте өңір әкімі Ғауез Нұрмұхамбетов мәлімдеді, деп хабарлайды Dalanews.kz
Президент жүктеген міндет – жыл қорытындысы бойынша экономиканың кемінде 6,5% өсуін қамтамасыз ету аясында СҚО бүгінде алда келе жатқан динамиканы көрсетуде. Оныншы айдың қорытындысы бойынша қысқа мерзімді экономикалық индикатор 13% құрап, облыс Қазақстан өңірлері арасында 5-орынды иеленді.
Негізгі салалардың барлығы дерлік тұрақты өсім көрсетуде. Он айда ауыл шаруашылығы 9,3%-ға, өнеркәсіп – 19,1%-ға, құрылыс – 30,1%-ға өсті. Тұрғын үйді пайдалануға беру көлемі 3,9%-ға артты, инвестициялар көлемі 7,3%-ға ұлғайды.
Мұндай көрсеткіштер Солтүстік Қазақстан облысы қазіргі сын-қатерлерге сенімді түрде төтеп беріп қана қоймай, ел экономикасының өсу драйверлерінің біріне айналып келе жатқанын дәлелдейді.
