«ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ قۇرامىنا ءدىني-رۋحاني ەسكەرتكىش رەتىندە الىنعان، جالپى كولەمى - 90 گەكتار جەردى قامتيتىن ۇكاشا اتا كەسەنەسى مەن قۇدىعىنا بارار جولعا بيىلعى جىلى اسفالت جول توسەلىپ، اباتتاندىرۋ جۇمىستارى جانداندى.
زياراتشىلارعا ارناپ ارنايى دەمالاتىن باستىرمالار مەن ورىندىقتار ورناتىلىپ، اۆتوتۇراق پەن الاڭ جانە اجەتحانالار رەتكە كەلتىرىلدى.
«ازىرەت سۇلتان» قورىق-مۋزەيىنە قاراستى 98 ءدىني-رۋحاني ورىندار مەن ەسكەرتكىشتەر بار. ولاردىڭ ءارقايسىسىنىڭ ءوز تاريحى مەن اڭىز-اڭگىمەلەرى جەتەرلىك.
تۋريزم سالاسىن دامىتىپ-كەلۋشىلەردىڭ ىنتاسىن ارتتىرۋ تەك اڭىز-اڭگىمەلەردى عانا ناسيحاتتاۋ ەمەس، تاريحي ورىنداردىڭ كوركى مەن كەلبەتىن جاقسارتۋ، حالىققا جايلى جاعداي جاساۋ.
"وسى ماقساتتا-ۇكاشا اتا كەسەنەسى مەن قۇدىعى ايماعىندا قۋاتتى ەلەكتر جۇيەسىن تارتۋ، اۋىز سۋعا ارنالعان قۇدىق قازۋ، اباتتاندىرۋ سىندى كوپتەگەن ماسەلەلەر «ازىرەت سۇلتان» قورىق- مۋزەيىنىڭ نەگىزگى كۇن تارتىبىندە تۇر. ارنايى قۇبىرلار تارتۋ ارقىلى اعىن سۋ جۇرگىزىپ كوركەيتۋ، كوگالداندىرۋ جۇمىستارى قاراستىرىلۋدا. مۇنىڭ ءبارى كەلۋشىلەرگە، ياعني تۋريستەرگە ساپالى قىزمەت كورسەتۋ ءۇشىن ىسكە اسىرىلۋى ءتيىس شارۋالار»، - دەيدى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ديرەكتورى نۇربولات احمەتجانوۆ.
بۇعان دەيىن، زياراتشىلار مەن ساياحاتشىلاردىڭ كەسەنەدەن 2 شاقىرىمعا جۋىق جەردەگى ۇكاشا اتا قۇدىعىنا قاتىناۋى اجەپتەۋىر اۋرە-سارساڭعا سالاتىن.
سەبەبى، قوس ارانىڭ قاشىقتىعى جازدىكۇنگى ىستىقتا، كوكتەم- كۇز ايلارىنداعى لاي-باتپاقتا جاياۋ ادام تۇگىلى كولىكتەگى كىسىنى دە قاجىتاتىن.
مەككەدەگى ءزام-زام سۋىنىڭ قاسيەتىمەن بىردەي سانالاتىن قىر باسىنداعى قۇدىققا اعىلعان جۇرتشىلىق جۋىردا عانا توسەلگەن جاڭا جول مەن اباتتاندىرۋ ىستەرىنە العىستارىن بىلدىرۋدە.
