ق ر ەڭبەك جانە حالىقتى الەۋمەتتىك قورعاۋ مينيسترلىگى زەينەتاقى جيناقتارىنىڭ ءبىر بولىگىن مەرزىمىنەن بۇرىن الۋعا ارنالعان ەڭ تومەنگى جەتكىلىكتىلىك شەگىن ايقىنداۋ ادىستەمەسىن قايتا قاراۋ سەبەپتەرىن ءتۇسىندىردى، دەپ حابارلايدى Dalanews.kz.
الداعى وزگەرىستەردىڭ نەگىزگى ماقساتى – ازاماتتاردىڭ قارجىلىق تۇراقتىلىعىن قامتاماسىز ەتىپ، قارتتىق كەزەڭدە لايىقتى تولەمدەر الۋىنا كەپىلدىك بەرۋ.
مينيسترلىك اتاپ وتكەندەي، زەينەتاقى جيناقتارى ەڭ الدىمەن ادام زەينەتكە شىققاننان كەيىنگى تۇراقتى تابىس كوزى بولۋى ءتيىس. بۇل قاراجاتتى كەز كەلگەن ۋاقىتتا الىپ جۇمسايتىن دەپوزيت رەتىندە قاراستىرۋعا بولمايدى. اسىرەسە، بولاشاق زەينەتاقىسى مەملەكەتتەن تولەنەتىن بازالىق تولەم مەن وزدەرىنىڭ جيناقتارىنا نەگىزدەلەتىن جاس قازاقستاندىقتار ءۇشىن بۇل قارجىنى ساقتاۋ اسا ماڭىزدى.
قازىرگى قولدانىستاعى ادىستەمە جيناقتىڭ جەتكىلىكتىلىك شەگىنەن اساتىن بولىگىن الۋعا مۇمكىندىك بەرەدى. الايدا ول كوبىنە «ءمىنسىز» سەنارييگە نەگىزدەلگەن: ياعني ازامات تۇراقتى تۇردە مىندەتتى زەينەتاقى جارنالارىن اۋدارىپ، زەينەت جاسىنا دەيىن قاجەتتى سومانى جينايدى دەپ بولجانادى. ال ومىردە كەزدەسەتىن جاعدايلار، مىسالى، تۇراقتى تابىستىڭ بولماۋى نەمەسە جۇمىسسىزدىق كەزەڭدەرى ەسكەرىلمەيدى.
سونىمەن قاتار، سوڭعى ءۇش جىل ىشىندە ەڭ تومەنگى جەتكىلىكتىلىك شەگى قايتا قارالماعانى دا تۇزەتۋلەر ەنگىزۋگە نەگىز بولدى.
وسىعان بايلانىستى مينيسترلىك ەكونوميكالىق تۇرعىدان نەگىزدەلگەن (اكتۋارلىق) تاسىلگە سۇيەنگەن جاڭا ەسەپتەۋ ادىستەمەسىنە كوشۋدە. ەندى ەسەپتەۋلەر كۇتىلەتىن ءومىر ءسۇرۋ ۇزاقتىعىن، ينۆەستيسيالىق تابىستىلىقتى جانە بولاشاق تولەمدەردىڭ ماقساتتى دەڭگەيىن ەسكەرەتىن بولادى.
مىسال رەتىندە: 46 جاستاعى سالىمشىنىڭ شوتىندا 11 ملن تەڭگە بار دەلىك. ونىڭ جاسىنا سايكەس جەتكىلىكتىلىك شەگى – 7،8 ملن تەڭگە، ياعني قازىرگى جاعدايدا ول 3،2 ملن تەڭگەنى شەشىپ الا الادى.
- ەگەر وسى سومانى شەشىپ السا، بولاشاقتا ءبىرىڭعاي جيناقتاۋشى زەينەتاقى قورىنان الاتىن اي سايىنعى تولەمى ەڭ تومەنگى دەڭگەيدە قالىپتاسادى (قازىرگى ەسەپ بويىنشا – ەڭ تومەنگى كۇنكورىس دەڭگەيىنىڭ 70%-ى نەمەسە شامامەن 35،6 مىڭ تەڭگە)
- ال ەگەر جيناقتاعى قاراجاتتى الماي، ساقتاپ قالسا، بولاشاقتاعى زەينەتاقىسى شامامەن 2–2،5 ەسە جوعارى بولۋى مۇمكىن.
جاڭا وزگەرىستەردىڭ نەگىزگى ءمانى – ازامات بۇگىن جيناقتىڭ ءبىر بولىگىن پايدالانعان كۇننىڭ وزىندە، ەرتەڭ لايىقتى زەينەتاقى الۋعا جەتكىلىكتى قاراجاتتىڭ ساقتالۋىن قامتاماسىز ەتۋ. مەملەكەت ازاماتتاردىڭ ۇزاق مەرزىمدى مۇددەلەرىن قورعاۋدى جالعاستىرىپ، ءاربىر قازاقستاندىقتىڭ قارتايعاندا قارجىلىق تۇرعىدان سەنىمدى بولۋىنا جاعداي جاساۋدى كوزدەيدى.
