QR Eńbek jáne halyqty áleýmettik qorǵaý ministrligi zeinetaqy jinaqtarynyń bir bóligin merziminen buryn alýǵa arnalǵan eń tómengi jetkiliktilik shegin aiqyndaý ádistemesin qaita qaraý sebepterin túsindirdi, dep habarlaidy Dalanews.kz.
Aldaǵy ózgeristerdiń negizgi maqsaty – azamattardyń qarjylyq turaqtylyǵyn qamtamasyz etip, qarttyq kezeńde laiyqty tólemder alýyna kepildik berý.
Ministrlik atap ótkendei, zeinetaqy jinaqtary eń aldymen adam zeinetke shyqqannan keiingi turaqty tabys kózi bolýy tiis. Bul qarajatty kez kelgen ýaqytta alyp jumsaityn depozit retinde qarastyrýǵa bolmaidy. Ásirese, bolashaq zeinetaqysy memleketten tólenetin bazalyq tólem men ózderiniń jinaqtaryna negizdeletin jas qazaqstandyqtar úshin bul qarjyny saqtaý asa mańyzdy.
Qazirgi qoldanystaǵy ádisteme jinaqtyń jetkiliktilik sheginen asatyn bóligin alýǵa múmkindik beredi. Alaida ol kóbine «minsiz» stsenariige negizdelgen: iaǵni azamat turaqty túrde mindetti zeinetaqy jarnalaryn aýdaryp, zeinet jasyna deiin qajetti somany jinaidy dep boljanady. Al ómirde kezdesetin jaǵdailar, mysaly, turaqty tabystyń bolmaýy nemese jumyssyzdyq kezeńderi eskerilmeidi.
Sonymen qatar, sońǵy úsh jyl ishinde eń tómengi jetkiliktilik shegi qaita qaralmaǵany da túzetýler engizýge negiz boldy.
Osyǵan bailanysty ministrlik ekonomikalyq turǵydan negizdelgen (aktýarlyq) tásilge súiengen jańa esepteý ádistemesine kóshýde. Endi esepteýler kútiletin ómir súrý uzaqtyǵyn, investitsiialyq tabystylyqty jáne bolashaq tólemderdiń maqsatty deńgeiin eskeretin bolady.
Mysal retinde: 46 jastaǵy salymshynyń shotynda 11 mln teńge bar delik. Onyń jasyna sáikes jetkiliktilik shegi – 7,8 mln teńge, iaǵni qazirgi jaǵdaida ol 3,2 mln teńgeni sheship ala alady.
- Eger osy somany sheship alsa, bolashaqta Biryńǵai jinaqtaýshy zeinetaqy qorynan alatyn ai saiynǵy tólemi eń tómengi deńgeide qalyptasady (qazirgi esep boiynsha – eń tómengi kúnkóris deńgeiiniń 70%-y nemese shamamen 35,6 myń teńge)
- Al eger jinaqtaǵy qarajatty almai, saqtap qalsa, bolashaqtaǵy zeinetaqysy shamamen 2–2,5 ese joǵary bolýy múmkin.
Jańa ózgeristerdiń negizgi máni – azamat búgin jinaqtyń bir bóligin paidalanǵan kúnniń ózinde, erteń laiyqty zeinetaqy alýǵa jetkilikti qarajattyń saqtalýyn qamtamasyz etý. Memleket azamattardyń uzaq merzimdi múddelerin qorǵaýdy jalǵastyryp, árbir qazaqstandyqtyń qartaiǵanda qarjylyq turǵydan senimdi bolýyna jaǵdai jasaýdy kózdeidi.
