2025 جىلدىڭ جەلتوقسان ايىندا زەينەتاقى جيناعىن ءبىرجولعى الۋ ارقىلى راديوحيرۋرگيالىق ەمدى تولەۋگە 7154 ءوتىنىش راسىمدەلگەن، دەپ حابارلايدى Dalanews.kz.
بيۋرو مالىمەتىنشە، اڭگىمە ساۋلەلىك تەراپيانىڭ ارنايى تۇرلەرى، ياعني گامما-پىشاق پەن كيبەرپىشاق ادىستەرى تۋرالى بولىپ وتىر. بۇل تاسىلدەر كوبىنە ىسىك اۋرۋلارىنا شالدىققان ناۋقاستاردى ەمدەۋدە قولدانىلادى. جەلتوقسان ايىندا ورىندالعان وتىنىشتەردىڭ جالپى كولەمى شامامەن 5،6 ملرد تەڭگەگە جەتكەن.
پكب اتاپ وتكەندەي، ءبىر ايداعى بۇل كورسەتكىش باعدارلاما ىسكە قوسىلعالى بەرگى بارلىق كەزەڭمەن سالىستىرعاندا ايتارلىقتاي جوعارى. ماسەلەن، 2025 جىلعى 1 جەلتوقسانعا دەيىن راديوحيرۋرگيا بويىنشا بار بولعانى 507 ءوتىنىش ورىندالىپ، ولاردىڭ جالپى سوماسى 548 ملن تەڭگەنى عانا قۇراعان.
وتىنىشتەر سانىنىڭ ءوسۋى قاراشا ايىندا-اق بايقالا باستاعان. ول كەزدە 236 ءوتىنىش ورىندالىپ، 204 ملن تەڭگە تولەنگەن. ال 2025 جىلدىڭ باسىنان بەرى بۇل سانات بويىنشا ورتاشا ايلىق كورسەتكىشتەر 10 وتىنىشكە دە جەتپەگەن.
ءبىرىنشى كرەديتتىك بيۋرو مۇنداي سەرپىندى ءوسىم سوڭعى ايلاردا العاش رەت تىركەلىپ وتىرعان جوق ەكەنىن اتاپ ءوتتى. قىركۇيەك ايىندا ستوماتولوگيالىق قىزمەتتەرگە زەينەتاقى جيناعىن الۋعا تىيىم سالىنعاننان كەيىن، مەديسينالىق باعىتتار بويىنشا كەزەك-كەزەگىمەن جاڭا «سەرپىلىستەر» پايدا بولا باستاعان. ستوماتولوگيا سالاسىنداعى شەكتەۋلەر كوپتەگەن جالعان قۇجاتتار انىقتالعاننان كەيىن ەنگىزىلگەن.
ودان كەيىن قازاقستاندىقتار وفتالمولوگيالىق قىزمەتتەرگە تولەم جاساۋ ءۇشىن زەينەتاقى جيناعىن بەلسەندى پايدالانا باستاعان. الايدا بۇل باعىتتا دا كۇماندى بەلسەندىلىك تىركەلىپ، جەلتوقسان ايىنىڭ باسىندا كوز اۋرۋلارىن ەمدەۋگە ءوتىنىش قابىلداۋ توقتاتىلعان.
قاراشا ايىندا پلاستيكالىق وپەراسيالارعا قاتىستى وتىنىشتەر كۇرت كوبەيگەن. بۇل باعىت تا ءقازىر شەكتەلىپ، جەلتوقسان ايىنىڭ ورتاسىنان باستاپ ءوتىنىش قابىلداۋ ءىس جۇزىندە توقتاتىلعان.
قازىرگى تاڭدا زەينەتاقى جيناعىن ەمدەلۋگە پايدالانۋ مۇمكىندىگى تەك اۋىر ءارى ناقتى مەديسينالىق كورسەتىلىمدەرمەن بايلانىستى تار ساناتتاردا عانا ساقتالعان. ولاردىڭ قاتارىندا راديوحيرۋرگيادان بولەك ورفاندىق اۋرۋلاردى ەمدەۋ، راديونۋكليدتى جانە راديويودتەراپيا، سونداي-اق پروتوندىق تەراپيا بار.
پكب مالىمەتىنشە، جەلتوقسان ايىندا اتالعان باعىتتار بويىنشا دا وتىنىشتەر سانى ارتا باستاعان، الايدا ازىرگە بۇل كورسەتكىشتەر مىڭداعان نەمەسە جۇزدەگەن دەڭگەيگە جەتكەن جوق.
