2025 jyldyń jeltoqsan aiynda zeinetaqy jinaǵyn birjolǵy alý arqyly radiohirýrgiialyq emdi tóleýge 7154 ótinish rásimdelgen, dep habarlaidy Dalanews.kz.
Biýro málimetinshe, áńgime sáýlelik terapiianyń arnaiy túrleri, iaǵni gamma-pyshaq pen kiberpyshaq ádisteri týraly bolyp otyr. Bul tásilder kóbine isik aýrýlaryna shaldyqqan naýqastardy emdeýde qoldanylady. Jeltoqsan aiynda oryndalǵan ótinishterdiń jalpy kólemi shamamen 5,6 mlrd teńgege jetken.
PKB atap ótkendei, bir aidaǵy bul kórsetkish baǵdarlama iske qosylǵaly bergi barlyq kezeńmen salystyrǵanda aitarlyqtai joǵary. Máselen, 2025 jylǵy 1 jeltoqsanǵa deiin radiohirýrgiia boiynsha bar bolǵany 507 ótinish oryndalyp, olardyń jalpy somasy 548 mln teńgeni ǵana quraǵan.
Ótinishter sanynyń ósýi qarasha aiynda-aq baiqala bastaǵan. Ol kezde 236 ótinish oryndalyp, 204 mln teńge tólengen. Al 2025 jyldyń basynan beri bul sanat boiynsha ortasha ailyq kórsetkishter 10 ótinishke de jetpegen.
Birinshi kredittik biýro mundai serpindi ósim sońǵy ailarda alǵash ret tirkelip otyrǵan joq ekenin atap ótti. Qyrkúiek aiynda stomatologiialyq qyzmetterge zeinetaqy jinaǵyn alýǵa tyiym salynǵannan keiin, meditsinalyq baǵyttar boiynsha kezek-kezegimen jańa «serpilister» paida bola bastaǵan. Stomatologiia salasyndaǵy shekteýler kóptegen jalǵan qujattar anyqtalǵannan keiin engizilgen.
Odan keiin qazaqstandyqtar oftalmologiialyq qyzmetterge tólem jasaý úshin zeinetaqy jinaǵyn belsendi paidalana bastaǵan. Alaida bul baǵytta da kúmándi belsendilik tirkelip, jeltoqsan aiynyń basynda kóz aýrýlaryn emdeýge ótinish qabyldaý toqtatylǵan.
Qarasha aiynda plastikalyq operatsiialarǵa qatysty ótinishter kúrt kóbeigen. Bul baǵyt ta qazir shektelip, jeltoqsan aiynyń ortasynan bastap ótinish qabyldaý is júzinde toqtatylǵan.
Qazirgi tańda zeinetaqy jinaǵyn emdelýge paidalaný múmkindigi tek aýyr ári naqty meditsinalyq kórsetilimdermen bailanysty tar sanattarda ǵana saqtalǵan. Olardyń qatarynda radiohirýrgiiadan bólek orfandyq aýrýlardy emdeý, radionýklidti jáne radioiodterapiia, sondai-aq protondyq terapiia bar.
PKB málimetinshe, jeltoqsan aiynda atalǵan baǵyttar boiynsha da ótinishter sany arta bastaǵan, alaida ázirge bul kórsetkishter myńdaǵan nemese júzdegen deńgeige jetken joq.
