ۋكراينا پرەزيدەنتى ۆلاديمير زەلەنسكيي رەسەي ۇسىنعان بىتىمگە قاتىستى پىكىر ءبىلدىردى، دەپ حابارلايدى Dalanews.kz.
ونىڭ ايتۋىنشا، رەسەي پرەزيدەنتى ۆلاديمير پۋتين 8-11 مامىر ارالىعىندا جاريالاعان ۋاقىتشا ءبىتىم – شىنايى ءبىتىم ەمەس، تەك ساياسي مانيپۋلياسيا. زەلەنسكيي اتىستى توقتاتۋ بىرنەشە كۇنگە عانا ەمەس، تۇراقتى تۇردە جۇزەگە اسىرىلۋى ءتيىس دەپ سانايدى. ول ەڭ تومەنگى مەرزىم رەتىندە 30 كۇندى اتادى.
"ءبىتىم بىرنەشە كۇنگە عانا ەمەس، شۇعىل، تولىق ءارى ءسوزسىز توقتاتىلۋى ءتيىس. ەڭ كەمى 30 كۇنگە سوزىلۋى قاجەت"، – دەدى ۆلاديمير زەلەنسكيي ءوزىنىڭ ۆيدەوۇندەۋىندە.
سونداي-اق كييەۆ بيلىگى دە ءپۋتيننىڭ 9 مامىرعا بايلانىستى جاساعان ۇسىنىسىنا قاتىستى پىكىر ءبىلدىردى.
ۋكراينا سىرتقى ىستەر ءمينيسترىنىڭ ورىنباسارى اندرەي سيبيگا ماسكەۋ باستاماسىنا قاتىستى مالىمدەمەسىندە ەلدىڭ ۇزاق مەرزىمدى اتىستى توقتاتۋعا دايىن ەكەنىن ايتتى.
"نەلىكتەن 8 مامىرعا دەيىن كۇتۋدى ۇسىندى؟ ەگەر اتىستى ءدال ءقازىر، كەز كەلگەن كۇننەن باستاپ 30 كۇنگە توقتاتۋعا مۇمكىندىك بولسا – بۇل شىندىققا اينالۋى مۇمكىن، تەك پاراد ءۇشىن ەمەس"، – دەدى سيبيگا.
ول سونداي-اق ۋكراينا "ۇزاق مەرزىمدى، بەرىك جانە تولىق اتىستى توقتاتۋعا دايىن ەكەنىن" جانە كييەۆ بۇنى ۇنەمى ۇسىنىپ كەلە جاتقانىن ەسكە سالدى.
ەسكە سالايىق، بۇعان دەيىن ساياساتتانۋشى قازىبەك مايگەلدينوۆ ترامپتىڭ رەسەي-ۋكراينا قاقتىعىسىن شەشۋدەگى ءرولى تۋرالى ويىن اشىپ ايتقان بولاتىن.
ساياساتتانۋشىنىڭ سوزىنشە، دونالد ترامپ ۋكراينا مەن رەسەيگە قاتىستى ءوز ۇستانىمىن الەۋمەتتىك جەلىدە، باق-تا اشىق ءبىلدىرىپ كەلە جاتىر.
"ول بۇل قاقتىعىستى وتە قىسقا مەرزىمدە توقتاتۋعا بولاتىنىن، ءتىپتى پرەزيدەنت بولعان ۋاقىتتا 24 ساعاتتىڭ ىشىندە بەيبىت كەلىسىم ورناتا الاتىنىن بىرنەشە رەت ايتتى. ترامپ سوعىستى توقتاتۋ ءۇشىن ناقتى قانداي قادامدار ۇسىناتىنىن تولىق اشىپ ايتپاسا دا، ناقتى ارەكەتتەر كورسەتىلمەسە دە ونىڭ ريتوريكاسىنان بايقالاتىن نارسەلەر بار. وسى تۇستا بەس نەگىزگى فاكتوردى اتاپ وتكىم كەلەدى. بىرىنشىدەن ترامپ رەسەي مەن ۋكراينانى تىكەلەي كەلىسسوزگە شاقىرۋدا جانە تەز ىمىراعا كەلۋدى تالاپ ەتىپ وتىر. ول بۇل ريتوريكاسىن ايتقان كەزدە: "ەگەر ماسكەۋ نە كييەۆ بەيبىت كەلىسىمگە كەلۋدى قيىنداتسا، اقش بۇل كەلىسسوزدەن باس تارتىپ، تىس قالاتىنىن ەسكەرتتى. ياعني بۇل ارقىلى ترامپ ەكى تاراپقا دا قىسىم جاساپ، جىلدام ناتيجەگە قول جەتكىزگىسى كەلىپ وتىرعانىن اڭعارتتى. مىسالى مۇنداي تاكتيكانى ول يزرايل-پالەستينا قاقتىعىسى كەزىندە قولداندى"، - دەيدى قازىبەك مايگەلدينوۆ.
ەكىنشىدەن، ترامپ ۋكراينا تاراپىن سىناپ سويلەيدى. كەيدە قاقتىعىستىڭ باستالۋىنا كييەۆتى كىنالاپ، مالىمدەمەلەر جاسادى.
