كولىك ءمينيسترى مارات قارابايەۆ شىعىس قازاقستان وبلىسى زايسان اۋدانىنداعى جاڭا اۋەجاي الاڭىندا نەگىزگى قۇرىلىس جۇمىستارىنىڭ باستالۋ بارىسىمەن تانىستى، دەپ حابارلايدى Dalanews.kz
بۇل جۇمىس مەملەكەت باسشىسىنىڭ زايسان، قاتون-قاراعاي جانە كەندىرلى كۋرورتتىق ايماقتارىندا ءۇش جاڭا اۋەجاي سالۋ تاپسىرماسى اياسىندا جۇرگىزىلۋدە.
جوباعا سايكەس اۋەجاي زايسان قالاسىنان شامامەن 25 شاقىرىم جەردە ورنالاسقان ءساتباي اۋىلىنىڭ ماڭىنداعى بۇرىنعى اسكەري اۋەايلاق بازاسىندا سالىنادى. 184،5 گەكتار جەردى الىپ جاتقان ۋچاسكە گەوگرافيالىق جانە مەتەولوروگيالىق جاعدايدى، سونداي-اق لوگيستيكالىق قولجەتىمدىلىكتى ەسكەرە وتىرىپ تاڭدالدى.
اۋەجايدا الداعى ۋاقىتتا كەڭەيتۋ مۇمكىندىگىمەن ۇزىندىعى 2200 مەتر بولاتىن ۇشۋ-قونۋ جولاعى سالىنادى. بۇل اۋەجاي ايماعىندا Bombardier Q400، ATR-72 جانە باسقا دا ۇقساس تيپتەگى زاماناۋي اۋە كەمەلەرىن قابىلداۋعا مۇمكىندىك بەرەدى. ءقازىر وتاندىق اۋە كومپانيا ATR-72 ۇشاقتارىن ساتىپ الۋ ماسەلەسىن پىسىقتاۋدا. جوبا اياسىندا 4 اۋە كەمەسىنە ارنالعان پەررون، ساعاتىنا 150 جولاۋشىعا دەيىن وتكىزۋ قابىلەتى بار 4000 شارشى مەترلىك زاماناۋي اەروۆوكزال، كوماندالىق-ديسپەچەرلىك پۋنكت، اۆاريالىق-قۇتقارۋ قىزمەتى، مەتەوستانسيا جانە راديوناۆيگاسيالىق جابدىقتار قاراستىرىلعان.
«اۋەجاي قۇرىلىسى اياقتالىپ، نىسان قولدانىسقا بەرىلگەن سوڭ قىتايدىڭ ءۇرىمشى، التاي جانە قاناس قالالارىنا حالىقارالىق باعىتتار اشۋ جوسپارلانعان. استانا، الماتى جانە وسكەمەنگە قاتىنايتىن ىشكى باعىتتار تۇراقتى اۋە بايلانىسىن قامتاماسىز ەتىپ، بيزنەس ءۇشىن جاڭا مۇمكىندىكتەر اشىپ، ەل تۇرعىندارىنىڭ ءجۇرىپ-تۇرۋىن جاقسارتا تۇسپەك»، — دەدى كولىك ۆەدومستۆوسىنىڭ باسشىسى مارات قارابايەۆ.
ءقازىر زايسانعا جىل سايىن شامامەن 23 مىڭ تۋريست كەلەدى. اۋەجاي ىسكە قوسىلىپ، ينفراقۇرىلىم دامي تۇسكەندە بۇل كورسەتكىش 136 مىڭ تۋريستكە دەيىن وسەدى دەپ كۇتىلۋدە.
مارات قارابايەۆ اۋەجاي قۇرىلىسى قازاقستاننىڭ لوگيستيكالىق الەۋەتىن دامىتۋعا قوسىمشا مۇمكىندىك اشاتىنىن اتاپ ءوتتى. ءساتباي اۋىلى ماڭىندا جاڭا اۋەجاي سالۋ جانە «قالباتاۋ-مايقاپشاعاي» كۇرە جولىنىڭ رەكونسترۋكسياسىن اياقتاۋ جۇمىستارى زايسان قالاسىندا ارنايى ءىرى لوگيستيكالىق حاب اشۋعا مۇمكىندىك بەرەدى. كولىك ءمينيسترى ءقازىر بۇل ماسەلەنى رەسەي فەدەراسياسى مەن جۇڭگو حالىق رەسپۋبليكاسىنداعى ارىپتەستەرمەن پىسىقتالىپ جاتقانىن اتاپ ءوتتى.
بۇل رەتتە تۇعىل اۋىلىندا وزەن پورتى سالىنادى. باستاپقى كەزەڭدە جۇكتەر تۇعىل پورتىنا اۆتوكولىكپەن تاسىمالدانادى. ودان ءارى رەسەي فەدەراسياسىنا قاراي وزەن ارقىلى كەمە قاتىناسى ورناتىلادى. جۇكتەردىڭ باستاپقى كولەمى 2 ملن توننا بولسا، ۋاقىت وتە كەلە بۇل كورسەتكىش 10 ملن تونناعا دەيىن ارتادى دەپ كۇتىلۋدە. قىتايداعى ارىپتەستەرمەن ءقازىر «تۇعىل» پورتىن تەمىرجولمەن بايلانىستىراتىن جانە رەسەيدەگى وب وزەنىنە، ودان ءارى سولتۇستىك تەڭىزگە شىعاتىن «قىتاي-قازاقستان-رەسەي» مۋلتيمودالدى لوگيستيكالىق مارشرۋتىن قۇرۋعا باعىتتالعان ءتورتىنشى تەمىرجول وتكەلى پۋنكتىن سالۋ پىسىقتالۋدا.
سونداي-اق بيىل ماماندار شىعىس قازاقستان وڭىرىندەگى بارلىق بەس تەمىرجول ۆوكزالىن (وسكەمەن-1، التاي، كۇمىستاۋ، ريددەر، شەمونايحا) جوندەيدى.
