قازاقستان تاۋەلسىز ەل ماريا زاحاروۆانىڭ ءبىزدىڭ ەلشىگە بۇلايشا اكىرەڭدەۋى ورىنسىز. ەگەر ءپوتر ۆرۋبليەۆسكييگە قاتىستى ايتار ارىز-ارمانى بولسا، ۋكراينا سىرتقى ىستەر ءمينيسترى ديميتريي كۋلەباعا بارىپ ايتپاي ما؟
ءبىزدىڭ سىرتىق ۆەدموستۆانىڭ وكىلدەرى ءپوتر ۆرۋبليەۆسكيي بلوگەر دياس كۋزايروۆ بەرگەن سۇحباتىنان كەيىن شاقىرىپ الىپ، ەل ىشىندە ۇلتارازدىق تۋدىرۋعا جول بەرىلمەيتىنىن ەسكەرتكەن بولاتىن.
وسىدان كەيىن ۋكراين ەلشىسى ءوزىنىڭ قازاقستانداعى ميسسياسىن اياقتاپ، ەلىنە ورالعان-دى. اراعا ءبىراز ۋاقىت سالىپ ءپوتر ۆرۋبليەۆسكيي قازاقستانداعى وتباسىن الىپ كەتۋ ءۇشىن قازاقستانعا كەلگەن بولاتىن. ول سول ارالىقتا ەلىمىزدەگى ۋكراين ەلشىلىگىنە بارعان.
ءپوتر ۆرۋبليەۆسكييدىڭ ءوز ەلىنىڭ ەلشىلىگىنە بارعانى زاحاروۆانىڭ ايازداي باتسا كەرەك. ول وسىدان كەيىن ماسكەۋدەگى ءبىزدىڭ ەلشىنى شاقىرىپ الىپ ءبىراز «اڭگىمە» ايتىپ ءپوتر ۆرۋبليەۆسكييدى ەلدەن تەزدەتىپ شىعارۋدى تالاپ ەتىپتى. زاحاروۆانىڭ مۇنىسى ەندى اسقاندىق.
سوعىستان قاشقان مىڭدارعان ورىس سىيعان قازاقستانعا ۋكراينانىڭ ءبىر ەلشىسى سىيماي ما؟ ونىڭ ءبىزدىڭ ەلدە ايالدايتىنداي ۋاقىتى دا جوق. زاحاروۆا ايتتى ەكەن دەپ وتباسىن الىپ كەتۋگە كەلگەن ەلشىنى اسىقتىرۋ ورىسىز عوي.
زاحاروۆا «ءپوتر ۆرۋبليەۆسكيي ديپلوماتيكالىق ەتيكا مەن ءوزى قىزمەت ەتىپ جاتقان ەلدىڭ زاڭىن سىيلاماعاندى بىلاي قويعاندا، قاراپايىم مادەنيەتتىڭ شەگىنەن شىعىپ، ۇلتارازدىق جانجال تۋعىزۋعا ارەكەتتەنۋدە» دەپ ءبىزدىڭ ەلشىگە شاعىم ايتىپتى.
