كونستيتۋسيالىق سوت ەر ازاماتتىڭ ءوتىنىشىن قاراۋعا شەشىم قابىلدادى. ول اكىمشىلىك قاماۋ شاراسىن قولدانۋداعى ەرلەرگە قاتىستى ادىلەتسىزدىككە شاعىمدانعان، دەپ حابارلايدى Dalanews.kz.
اكىمشىلىك كودەكستىڭ 50-بابى، 2-بولىگىنە سايكەس، اكىمشىلىك قاماۋ جۇكتى ايەلدەرگە، 14 جاسقا دەيىنگى بالاسى بار انالارعا، كامەلەتكە تولماعاندارعا، ءى جانە ءىى توپ مۇگەدەكتەرىنە، 58 جاستان اسقان ايەلدەرگە، 63 جاستان اسقان ەرلەرگە، سونداي-اق 14 جاسقا دەيىنگى بالانى جالعىز ءوزى تاربيەلەپ وتىرعان اكەلەرگە قولدانىلمايدى.
ارىزدانۋشى بۇل نورما كونستيتۋسيانىڭ 14-بابىنا قايشى دەپ ەسەپتەيدى. ويتكەنى زاڭ ايەلدەرگە جەڭىلدىك جاساپ، ەرلەردى شەكتەيدى: انالار بالاسى بار بولسا قاماۋدان بوساتىلادى، ال اكەلەر تەك جالعىز اتا-انا بولعان جاعدايدا عانا جەڭىلدىككە يە.
"تەكسەرۋ بارىسى مەن ناتيجەسى تۋرالى اقپارات كونستيتۋسيالىق سوتتىڭ رەسمي سايتىندا جانە Telegram-ارناسىندا جاريالانادى"، – دەلىنگەن سوتتىڭ حابارلاماسىندا.
