ەستەرىڭىزدە بولسا، قورعانىس ىستەرى جونىندەگى وبلىستىق دەپارتامەنت باسشىسىنىڭ اسكەرگە شاقىرۋ جونىندەگى ورىنباسارى، 47 جاستاعى اسقار وسپانوۆ 52 جاستاعى دەپارتامەنت باسشىسى بەردىبەك بەرىستەنوۆتى اتىپ ءولتىرىپ، پوليسيا قىزمەتكەرلەرىنە بەرىلۋدەن باس تارتقان ەدى.
ول از بولعانداي، اسقار وسپانوۆ ءتارتىپ ساقشىلارىنا وق جاۋدىرىپ، عيماراتقا جاقىنداتپاعان.
سۋىت حابار تالدىقورعان قالاسىنىڭ ىشكى ىستەر باسقارماسىنىڭ (ءىىب) كەزەكشى بولىمىنە تاڭعى 8 ساعات 10 مينۋتتا تۇسكەن.
سول مەزەتتە تالدىقورعان ءىىب-سىنىڭ جەكە قۇرامى دابىل بويىنشا كوتەرىلىپ، اسكەري كوميسسارياتتىڭ اۋماعى قورشاۋعا الىندى. باسقا قايعىلى وقيعالاردىڭ ورىن الۋىنا جول بەرمەۋ ماقساتىندا قورعانىس ۇيىمىنىڭ ۇجىمى ءقاۋىپسىز جەرگە كوشىرىلدى.
وقيعا ورنىنا قۇقىق قورعاۋ ورگاندارىنىڭ جانە باسقا دا كۇشتىك قۇرىلىمداردىڭ باسشىلارى جەتتى.
ادەتتە، سالەمى ءتۇزۋ الماتى وبلىستىق ىشكى ىستەر دەپارتامەنتىنىڭ باسشىسى مۇرات ۇرىمحانوۆ قاسىمىزدان ءۇن-تۇنسىز تومەن قاراپ وتە شىقتى.
ال وسپانوۆ بولسا، قارۋدى تاپسىرىپ، پوليسياعا بەرىلۋ تۋرالى ۇگىتكە نازار اۋدارار ەمەس. ول، ءتىپتى، كوز جاسىن توگىپ، وزىنە جالبارىنعان جۇبايىنىڭ ءسوزىن دە قۇلاعىنا قىستىرعان جوق.
تەك ءوزىنىڭ جان دوسى – قورعانىس ىستەرى جونىندەگى تالدىقورعان قالالىق باسقارماسىنىڭ باسشىسىس ەرەن مەيرامبەكوۆتىڭ ايتقانىنا كونىپ، پوليسياعا بەرىلۋگە كەلىستى.
ءسويتىپ، سىرتقا اياق باسقان ول
— گەنەرال مىرزا، ايىپقا بۇيىرماڭىز،
ول مەنى ابدەن مەزى قىلدى، ورىنسىز ءتيىسىپ، جۇرت كوزىنشە نامىسىمدى اياقاستى قىلىپ، بالاعاتتايتىن، شىدامىم تاۋسىلدى،
— دەدى ايىبىن مويىنداعان اسقار وسپانوۆ مۇرات ۇرىمحانوۆقا.
قورعانىس ىستەرى جونىندەگى اۋداندىق باسقارمالاردىڭ ءبىرىنىڭ باسشىسى “ۆرەميا” گازەتىنىڭ تىلشىسىنە قاندى وقيعادان ءبىر كۇن بۇرىن الماتى وبلىستىق دەپارتامەنتىندە كوكتەمگى اسكەرگە شاقىرۋ ماسەلەلەرى بويىنشا ءماجىلىس وتكەنىن ايتىپتى. سول وتىرىس بارىسىندا دەپارتامەنت باسشىسى بەرىستەنوۆ وسپانوۆتى ورنىنان تۇرعىزىپ، بەت-كوزىنە قارامااي، بالاعاتتاعان دەيدى.
ءقازىر اسقار وسپانوۆ تەرگەۋ اباقتىسىندا، قاماۋدا وتىر. اتالمىش فاكتىگە قاتىستى قىلمىستىق ءىس قوزعالدى.
مارقۇم بەردىبەك بەرىستەنوۆتىڭ ءمايىتىن كەشە تۋىستارى ۇشاقپەن شىمكەنتكە الىپ كەتتى. تالدىقورعاندا ول جالعىز تۇرعان ەكەن.
https://youtu.be/lA5RRT6pVCg
