ءىلياس جانسۇگىروۆ اتىنداعى جەتىسۋ ۋنيۆەرسيتەتىندە حالىقارالىق ءبىلىم بەرۋ كەڭىستىگىنە باعىتتالعان ماڭىزدى باستاما جۇزەگە اسىپ جاتىر. 2024–2025 جاڭا وقۋ جىلىندا ۋنيۆەرسيتەت بازاسىندا يتاليانىڭ ماركە پوليتەحنيكالىق ۋنيۆەرسيتەتى (Università Politecnica delle Marche) فيليالى ءوز جۇمىسىن رەسمي تۇردە جۇرگىزۋدە، دەپ حابارلايدى Dalanews.kz.
بۇل — قازاقستان مەن يتاليا اراسىنداعى ءعىلىمي-بىلىم بەرۋ بايلانىسىن نىعايتۋعا باعىتتالعان حالىقارالىق ىنتىماقتاستىقتىڭ ناقتى ناتيجەسى. فيليالدىڭ اشىلۋى ايماقتىق جوعارى ءبىلىم بەرۋ جۇيەسىنە جاڭا سەرپىن بەرىپ، جەتىسۋ جاستارىنا الەمدىك دەڭگەيدە ءبىلىم الۋعا مۇمكىندىك تۋعىزدى.
بۇگىندە وقۋ پروسەسىنە تىكەلەي يتاليالىق پروفەسسورلار قاتىسىپ، ءدارىس ساباقتارىن وتكىزىپ جاتىر. ولاردىڭ قاتارىندا: دوكتور جانلۋكا برۋنەتتي (Gianluca Brunetti) – اۋىل شارۋاشىلىعى حيمياسى جانە بيوحيمياسى بويىنشا اسسوسييرلەنگەن پروفەسسور، دوكتور سيمونە پيانچاتەللي (Simone Piancatelli) – وسىمدىك پاتولوگياسى سالاسىنىڭ بىلىكتى مامانى.
شەتەلدىك پروفەسسورلار ستۋدەنتتەرگە تەك تەوريالىق ءبىلىم بەرىپ قانا قويماي، يتاليا مەن ەۋروپانىڭ جەتەكشى زەرتحانالارىندا قولدانىلاتىن تاجىريبەلەرمەن، يننوۆاسيالىق ادىستەمەلەرمەن بولىسۋدە. ساباقتار ينتەراكتيۆتى فورماتتا ءوتىپ، زاماناۋي زەرتحانالىق قۇرالدار مەن مۋلتيمەديالىق تەحنولوگيالار كەڭىنەن قولدانىلۋدا.
جەتىسۋ ۋنيۆەرسيتەتى باسشىلىعىنىڭ ايتۋىنشا، بۇل جوبا ۋنيۆەرسيتەتتىڭ حالىقارالىق بەدەلىن ارتتىرىپ قانا قويماي، ءوڭىردىڭ ءبىلىم بەرۋ ەكوجۇيەسىنە جاڭا سەرپىن بەرمەك. ەكى ەلدىڭ عىلىمي قاۋىمداستىعى اراسىنداعى بۇل سەرىكتەستىك بولاشاقتا بىرلەسكەن زەرتتەۋلەر مەن اكادەميالىق الماسۋلارعا جول اشادى.
«ماركە پوليتەحنيكالىق ۋنيۆەرسيتەتىنىڭ فيليالى – ءبىزدىڭ ستۋدەنتتەرىمىز ءۇشىن الەمدىك ءبىلىم كەڭىستىگىنە جول. بۇل باستاما ساپالى ءبىلىم مەن حالىقارالىق تاجىريبەنى ۇشتاستىرۋدىڭ ناقتى ۇلگىسى. ءبىزدىڭ ماقساتىمىز – تۇلەكتەرىمىزدىڭ جاھاندىق ەڭبەك نارىعىندا باسەكەگە قابىلەتتى مامان بولىپ شىعۋى»، – دەيدى ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ باسقارما توراعاسى-رەكتور ەرمەك بورىبايەۆ.
ماركە پوليتەحنيكالىق ۋنيۆەرسيتەتىنىڭ فيليالى — جەتىسۋ ۋنيۆەرسيتەتىنىڭ حالىقارالىق دەڭگەيگە شىعۋىنداعى ماڭىزدى قادام جانە ەۋروپالىق ءبىلىم بەرۋ ستاندارتتارىن ەنگىزۋ باعىتىنداعى جاڭا بەلەس بولىپ وتىر.
