الەۋمەتتىك جەلىلەردە يران اۋماعىنىڭ ۇستىندە «قىشقىل بۇلتتار» پايدا بولىپ، ولار ورتالىق ازيا ەلدەرىنە جەتۋى مۇمكىن دەگەن اقپارات تارالىپ جاتىر، دەپ حابارلايدى Dalanews.kz.
كازگيدرومەت ماماندارىنىڭ مالىمەتىنشە، مۇنداي حابارلامالار جۇرگىزىلگەن باقىلاۋلار ناتيجەسىندە راستالمادى.
يران ۇستىندە پايدا بولدى دەلىنگەن جانە ورتالىق ازيا ەلدەرىنە جەتۋى مۇمكىن دەگەن «قىشقىل بۇلتتار» تۋرالى اقپارات عىلىمي دەرەكتەرمەن دە، جۇرگىزىلگەن باقىلاۋلارمەن دە دالەلدەنبەگەن.
قىشقىل جاۋىن-شاشىندار اتموسفەراعا نەگىزىنەن ونەركاسىپ، ەنەرگەتيكا جانە كولىك كوزدەرىنەن بولىنەتىن كۇكىرت پەن ازوت وكسيدتەرىنىڭ اسەرىنەن تۇزىلەدى.
ادەتتە مۇنداي قۇبىلىستار لاستاۋشى كوزدەرگە جاقىن ايماقتاردا بايقالادى. اۋا ماسسالارى الىس قاشىقتىققا تارالعان كەزدە بۇل زاتتاردىڭ كونسەنتراسياسى اتموسفەراداعى تابيعي پروسەستەردىڭ اسەرىنەن ەداۋىر تومەندەيدى.
مونيتورينگ دەرەكتەرىنە سايكەس، مۇنداي لاستاۋشى زاتتاردىڭ قازاقستان مەن ورتالىق ازيا ەلدەرى باعىتىنا تارالۋ بەلگىلەرى تىركەلگەن جوق. وسىعان بايلانىستى ماماندار تۇرعىندارعا ۇلتتىق مەتەورولوگيالىق جانە ەكولوگيالىق قىزمەتتەردىڭ رەسمي دەرەكتەرىنە سۇيەنىپ، تەكسەرىلمەگەن اقپاراتتى تاراتپاۋعا كەڭەس بەرەدى.
