Áleýmettik jelilerde Iran aýmaǵynyń ústinde «qyshqyl bulttar» paıda bolyp, olar Ortalyq Azıa elderine jetýi múmkin degen aqparat taralyp jatyr, dep habarlaıdy Dalanews.kz.

Kazgıdromet mamandarynyń málimetinshe, mundaı habarlamalar júrgizilgen baqylaýlar nátıjesinde rastalmady.

Iran ústinde paıda boldy delingen jáne Ortalyq Azıa elderine jetýi múmkin degen «qyshqyl bulttar» týraly aqparat ǵylymı derektermen de, júrgizilgen baqylaýlarmen de dáleldenbegen.

Qyshqyl jaýyn-shashyndar atmosferaǵa negizinen ónerkásip, energetıka jáne kólik kózderinen bólinetin kúkirt pen azot oksıdteriniń áserinen túziledi. 

Ádette mundaı qubylystar lastaýshy kózderge jaqyn aımaqtarda baıqalady. Aýa massalary alys qashyqtyqqa taralǵan kezde bul zattardyń konsentrasıasy atmosferadaǵy tabıǵı prosesterdiń áserinen edáýir tómendeıdi.

Monıtorıń derekterine sáıkes, mundaı lastaýshy zattardyń Qazaqstan men Ortalyq Azıa elderi baǵytyna taralý belgileri tirkelgen joq. Osyǵan baılanysty mamandar turǵyndarǵa ulttyq meteorologıalyq jáne ekologıalyq qyzmetterdiń resmı derekterine súıenip, tekserilmegen aqparatty taratpaýǵa keńes beredi.