"وتباسى بانكىنىڭ" باسشىسى ءلاززات يبراگيموۆا بۇگىن ۇكىمەتتە وتكەن باسپا ءسوز ءماسليحاتىندا "2025 جىلى يپوتەكالىق نەسيە تىركەتىپ ۇلگەرگەن قازاقستاندىقتاردىڭ مىندەتتەمەلەرىنە قىمباتتاعان دوللار باعامىنىڭ اسەر بولادى ما" دەگەن ساۋالعا جاۋاپ بەردى، دەپ جازادى Dalanews.kz.
ءلاززات يبراگيموۆا قازاقستاندا 15 جىلدان استام ۋاقىتتان بەرى يپوتەكالىق نەسيەلىك پورتفەلدىڭ 100%-ى تەك تەڭگەمەن بەرىلىپ كەلە جاتقانىن ەسكە سالدى.
"سوندىقتان قارىز الۋشىلار جاعدايى ۆاليۋتالىق اۋىتقۋلارعا تاۋەلدى ەمەس. سونىمەن قاتار، اقشا باعامىندا تۇراقسىزدىق بولعاندا، كەرىسىنشە جىلجىمايتىن مۇلىككە ناقتى ماتەريالدىق اكتيۆ رەتىندە سۇرانىس ارتادى. جەلتوقسان ايىنىڭ سوڭىندا ءبىز ونىڭ مامىلەلەر سانىنا قالاي اسەر ەتكەنىن تالداپ، تىڭ دەرەكتەر جاريالايتىن بولامىز"، – دەدى ول.
"دوللاردىڭ وسۋىنە بايلانىستى 2024 جىلى الەۋمەتتىك باسپانانىڭ ءبىر شارشى مەترىنىڭ قۇنى ءىرى پانەلدى ۇيلەردە 300-350 مىڭ تەڭگەنى قۇرادى. 2025 جىلى دا بءىز باعا بەلگىلەۋ ورتالىعىمەن بىرلەسە دوللاردىڭ ءوسۋ ىقتيمالدىلىعىن ەسكەرە وتىرىپ،باعانى قايتا ەسەپتەيتىن بولامىز. يپوتەكالىق قارىزدار بويىنشا شارتتىق مىندەتتەمەلەر بار. قارىز الۋشىلار باستاپقىدا قول قويىلعان شارتتار شەڭبەرىندە تولەم جاساۋدى جالعاستىرۋى ءتيىس. ياعني، بۇرىن بەرىلگەن ۇيلەر بويىنشا. ول ارادا جاڭادان ەشتەڭە قاراستىرىلماعان"، - دەدى قاجكەنوۆ.
دەمەك، دوللاردىڭ قىمباتتاۋى 2025 جىلى تىركەلەتىن يپوتەكالىق نەسيەلەردەن كورىنىس تابادى. بۇل كەلەسى جىلى باسپانا باعاسى قىمباتتايتىنىن بىلدىرەدى.
دەگەنمەن 2025 جىلى جىلجىمايتىن مۇلىككە قاتىستى مامىلەلەردى راسىمدەۋ قىمباتتاماق. ءويتكەنى ايلىق ەسەپتىك كورسەتكىش (اەك) كولەمى وسەدى، 1 قاڭتاردان باستاپ ول 3932 تەڭگەنى قۇراپ، 240 تەڭگەگە وسەدى.
"بۇل رەتتە ساتىپ الۋ-ساتۋ شارتىن راسىمدەۋ جانە كۋالاندىرۋ قۇنى جىلجىمايتىن مۇلىكتى كىم جانە كىمگە ساتاتىنىنا تىكەلەي بايلانىستى"، دەپ تۇسىندىرەدى ساراپشىلار.
- ەگەر ساتۋشى دا، ساتىپ الۋشى دا جەكە تۇلعا جانە جاقىن تۋىستارى بولسا، وندا بۇل قىزمەتتەر ولارعا 12 اەك نەمەسە 47 184 تەڭگە تۇرادى؛
- ەگەر ساتىپ الۋشى نەمەسە ساتۋشى جاقىن تۋىستارى بولسا، وندا - 7 اەك نەمەسە 27 524 تەڭگە بولادى؛
- ەگەر تاراپتاردىڭ كەم دەگەندە بىرەۋى زاڭدى تۇلعا بولسا – 17 اەك نەمەسە 66 844 تەڭگە؛
- يپوتەكالىق نەسيە الۋشىلار ءۇشىن -4 اەك نەمەسە 15 728 تەڭگە.
كۇيەۋىنىڭ نەمەسە ايەلىنىڭ نوتاريالدى كۋالاندىرىلعان كەلىسىمى 2025 جىلى 5898 تەڭگەنى (1،5 اەك) قۇرايدى. جالداۋ شارتىن كۋالاندىرۋ 10 اەك نەمەسە 39 320 تەڭگە بولماق. كەپىل شارتى دا سول سومادا. وسيەتتى كۋالاندىرۋ 2025 جىلى 3 اەك نەمەسە 11 796 تەڭگە تۇراتىن بولادى.
