23 ءساۋىر 2016 جىلى پاۆلودار وبلىسىنىڭ ەرتىس اۋدانىنا قاراستى قىزىلجار اۋىلىندا سەدين يگور دەگەن ازاماتتى بەلگىسىز بىرەۋلەر ءولتىرىپ كەتكەن.
ودان ءبىراز بۇرىن، ياعني 12 ناۋرىز كۇنى سەدين يگور مەن 1989 جىلى تۋعان حاۆسامەت نۇربول دەگەن ازاماتتىڭ اراسىندا جۇمىس بابىندا كەلىسپەۋشىلىك بولىپ، يگور نۇربولعا ءتىل تيگىزگەندىكتەن، سوڭعىسى يگوردى جۇدىرىعىمەن ءبىر مارتە ۇرىپ جىبەرگەن. الايدا كوپ كەشىكپەي نۇربول يگوردەن كەشىرىم سۇراپ، وعان جاڭا ۇيالى تەلەفون ساتىپ اپەرگەن، ءسويتىپ ەكەۋى تاتۋلاسىپ تىنعان.
الايدا، پوليسيا قىزمەتكەرلەرى يگوردىڭ ءولىمىن نۇربولدان كورىپ، «سەن كىنالىسىڭ، ولتىرگەن سەنسىڭ، ويتكەنى ەكەۋلەرىڭنىڭ ارالارىڭدا جانجال بولعاندىقتان سەن ونى قاساقانا ءولتىردىڭ» دەپ كىنالاپ ۇرىپ-سوعىپ، قىلقىندىرىپ-قيناپ كۇشتەپ مويىنداتقان. كەيىن سوت الدى تەرگەۋىندە نۇربول جازىقسىز مويىنداۋدان باس تارتىپ، شىندىقتى ايتقان.
قىلمىستىڭ قالاي جاسالعانىن ۇيرەتكەن جانە ۇرىپ-سوعۋدى تاعى باسقا قىلمىسقا قاتىستى مان-جايلەردى ۇيىمداستىرعان نەگىزگى تۇلعا پاۆلودار وبلىسى ەرتىس اۋداندىق ىشكى ىستەر باسقارماسىنىڭ بۇرىنعى ورىنباسارى وماروۆ ەربول سوت وتىرىسىندا بەتى قىپ-قىزىل بولىپ، اياق قولىن قويارعا جەر تاپپاي دىرىلدەپ تۇرعان. بارلىق شىندىقتى ايتىپ، قورقىتقانىن مويىنداتقان حاۆسامەت نۇربولعا قارسى ماردىمدى ەشتەڭە ايتا الماي، كەرىسىنشە نۇربولعا ءوزىنىڭ ۇيالى تەلەفون ءنومىرىن بەرگەنىن، ا-4 فورماتتىق قاعازعا ءمايىتتىڭ جاتقان جەرىن، قىلمىستىڭ جوسپارىن نۇربولعا سىزىپ بەرگەنىن مويىنداعان جانە 24 مامىر 2016 جىلى اپ-162/1 مەكەمەسىندە قاماۋدا وتىرعان حاۆسامەت نۇربولعا نە ءۇشىن كىرگەنىن ايتا الماي قوبالجىدى.
شىندىقتى ايتىپ قالاي شىرىلداسا دا، پاۆلودار وبلىسىنىڭ اۋدانارالىق ارنايى قىلمىستىق سوتى (سۋديا نۋركييەۆ ا. گ.) حاۆسامەت نۋربولدى ق ر قك-نىڭ 99 بابىنىڭ 1 تارماعى بويىنشا ايىپتاپ، 10 جىلعا باس بوستاندىعىنان ايىرۋعا جازا تاعايىنداعان.
نۇربولدىڭ قورعاۋشىسى، ونىڭ سەدين يگوردىڭ ولىمىنە ەشقانداي قاتىسى جوق ەكەنىن سوت ۇستىندە تولىق دالەلدەپ بەردى. قىلمىستىڭ سەبەپ-سالدارى، ۋاقىتى، زاتتاي ايعاقتار، قىلمىستىق ىستەگى قاراما-قايشىلىقتار، كۋالەردىڭ سوتتا بەرگەن جاۋاپتارى، ءىس بويىنشا ساراپتامالار – بارلىعى حاۆسامەت نۇربولدىڭ كىناسىز ەكەندىگىن كورسەتتى.
كۋاگەرلەر پوليسيادان قورقىپ دۇرىس كۋالىك ەتە المادى. ايتپەگەندە ءبىزدىڭ الدىندا جازىپ العان ايعاقتارىمىز بار. ءبىراق ول ۆيدەونى ادۆوكات سوتتا ۇسىنعانىمەن سۋديا قاراۋدان باس تارتتى. سوت ءىسى ءبىر جاقتى قارالىپ سۋديا نۇربولدىڭ العاشقى بەتتەگى پوليسياعا بەرگەن جاۋابىن العا تارتىپ بالامدى كىنالى دەپ تاپتى.
ەستەرىڭىزگە تاعى دا سالايىن، تەرگەۋشىلەر بالامدى ۇرىپ سوعىپ، اقىرى بولماعان سوڭ الداپ سۋلاپ «مويىنداي سالساڭ، جازاڭ جەڭىل بولىپ شارتتى تۇردە عانا سوتتالاسىڭ»، دەپ مويىنداتقان. بۇل جەردە ءىستىڭ ورىس تىلىندە جۇرگىزىلگەنىن جانە اۋدارماسى ماردىمسىز بولعانىن دا ەستەرىڭىزگە سالامىن.
ءىس بۇنىمەن ارينە بىتپەيدى. الدا اپەللياسيالىق، كاسساسيالىق سوت القالارى تۇر. ولار قانداي شەشىم قابىلدايتىنى ازىرگە بەيمالىم!
https://www.youtube.com/watch؟v=EHjIOLUeXg8&feature=youtu.be
