الماتى اكىمى ەربولات دوسايەۆتىڭ اۋەزوۆ اۋدانىنىڭ تۇرعىندارىمەن كەزدەسۋىندە قىزىق جايت بولعان ەدى. قالا اكىمى تۇرعىننان سىيلىق الدى. بۇگىن اكىمنىڭ ناۋرىزباي اۋدانى تۇرعىندارىمەن كەزدەسۋىنە سول ادام تاعى ىزدەپ كەلدى. ال بۇل جولى اكىم ودان كەشىرىم سۇرادى، - دەپ حابارلايدى Dalanews.kz.

حالىق اراسىندا ءجيى سىنعا قالاتىن دوسايەۆ وزىنە سىيلىق جاساعان جىگىتتى بىردەن تانىدى. ءتىپتى ودان كەشىرىم سۇراپ تا ۇلگەردى.

"قالايسىڭ؟ سەنى مەن ءۇشىن حەيتكە ۇشىراتتى، كەشىر.

كەيدە شىن جۇرەكتەن جاسالعان نارسەلەردى قوعام ءارقاشان دۇرىس قابىلداي بەرمەيدى. ءبىر جاعىنان الىپ قاراعاندا جۇمىسىما جانە ارىپتەستەرىمنىڭ جۇمىسىنا وڭ باعا بەرگەنىڭە ريزامىن، ءبىراق ساعان كەلگەن قولايسىزدىقتار ءۇشىن كەشىرىم سۇرايمىن"، - دەدى دوسايەۆ.

ايتا كەتەيىك، بۇعان دەيىن سول تۇرعىن اكىمگە قالادا شەشىلگەن ماسەلەلەر ءۇشىن العىس ايتقان ەدى.

"ءبىرىنشى كەزەكتە ەلەكتر ەنەرگياسىن ەسەپكە الۋ اسپاپتارىنىڭ 141-دەن 115 مىڭعا دەيىن تومەندەگەنى ءۇشىن العىسىمدى بىلدىرگىم كەلەدى. قىركۇيەكتە 90 ميلليون تەڭگەدەن اسا قاراجات ۇنەمدەلدى. ءسىز اۆتوبۋس جولاعىن جاسادىڭىز، سىزگە وسى ماسەلەنى ايتىپ جۇگىنگەنمىن، ول ءۇشىن دە راقمەت. اقجار جانە شۇعىلا شاعىناۋداندارىنىڭ تۇرعىندارىنىڭ اتىنان كوشەلەر سوزىلعانى ءۇشىن ەرەكشە راقمەت. سونداي-اق، بۇل اۋداندا ورتالىق سۋمەن جابدىقتاۋ جانە كارىز جۇيەسى بولادى. ءاربىر ماسەلەدە ءسىز قىزىعۋشىلىق تانىتتىڭىز"، - دەدى الماتىلىق.

ۆيدەودان كادر

وسىلايشا ريزا تۇرعىن دوسايەۆقا ونىڭ سۋرەتى مەن قالادا شەشىلگەن پروبلەمالار بەينەلەنگەن سۋرەت بەردى. ال ريزا شەنەۋنىك سىيلىقتى الىپ، ايەلىنە اپارىپ بەرەتىنىن جەتكىزدى.

"مەنى انتيكور الىپ كەتسە شە؟! ۇيگە الىپ كەتەمىن. سىيلىق ءۇشىن راقمەت، ايەلىمە اپارىپ بەرەمىن"، - دەپ كۇلدى دوسايەۆ بۇعان دەيىن.