حاسان قاسىمبايەۆتىڭ تۋىستارى پرەزيدەنتكە ۇندەۋ جولداپ، ءىستى جەكە باقىلاۋعا الۋدى سۇرادى، دەپ حابارلايدى Dalanews.kz.
ايىپتالۋشىنىڭ جۇبايى ءزۇلفيا قاسىمبايەۆا Nege.kz تەلەگرام ارناسىنا پىكىر ءبىلدىردى.
"ەگەر ءادىل شەشىم شىقپاسا، ءوزىمدى ءدال وسى جەردە ورتەيمىن"، - دەدى ول.
ايتا كەتەيىك، حاسان قاسىمبايەۆ 2024 جىلدىڭ 2 قاراشاسىندا ۇستالعان بولاتىن.
28 قازاندا پروكۋرور ەرلان قۇلانبايەۆ سوتتا قاسىمبايەۆتى 15 جىلعا باس بوستاندىعىنان ايىرۋدى سۇرادى. بۇل تۋرالى ايىپتالۋشىنىڭ ادۆوكاتى گۇلميرا باباجانوۆا رەداكسيا تىلشىسىنە حابارلاعان.
"ءبىز ايىپتاۋمەن تولىق كەلىسپەيمىز. قورعاۋ تارابى ءبىزدىڭ قورعاۋىمىزداعى ازاماتتى اقتاۋدى تالاپ ەتەدى، سەبەبى ەكى ەپيزود بويىنشا جابىرلەنۋشىنىڭ ءوز سوزىنەن باسقا ەشقانداي دالەل جوق"، – دەدى ادۆوكات.
قاسىمبايەۆقا ءۇش باپ بويىنشا ايىپ تاعىلعان: ادام ۇرلاۋ، دەنساۋلىققا قاساقانا اۋىر زيان كەلتىرۋ جانە زورلىقپەن اقشا تالاپ ەتۋ.
ونىمەن بىرگە سوت الدىندا تاعى بەس ادام جاۋاپ بەرىپ جاتىر. ءىس بويىنشا ەكى جابىرلەنۋشى بار: ارالاس جەكپە-جەك شەبەرى ءارى جاتتىقتىرۋشى ارمان ءالىموۆ جانە كاسىپكەر اريپجان تاجييەۆ.
