مەملەكەت باسشىسى قاسىم-جومارت توقايەۆ «قازاقستانعا اتوم ەلەكتر ستانساسى قاجەت» دەگەندى اشىق ايتىپ ءجۇر. ءتىپتى، اەس سالىناتىن الاڭ انىقتالىپ تا ۇلگەردى. ماماندار ونىڭ جوباسى مەن جوسپارىن سارالاپ، ەسەبىن دە ازىرلەۋگە جەڭ ءتۇرىپ كىرىسىپ كەتكەن. ماسەلەن، جوسپار جوباسىندا بالقاش ماڭىنداعى ۇلكەن اۋىلىندا سالىناتىن اەس 2035 جىلى پايدالانۋعا بەرىلەدى دەپ كورسەتىلگەن.
Dalanews.kz قازىرگى كەزدە وسى باعىتتا جۇرگىزىلىپ جاتقان جۇمىس ساتىسىن انىقتاۋ ءۇشىن "قازاقستان اتوم ەلەكتر ستانسيالارى" جشس-نىڭ جوبا باسقارۋ جونىندەگى باس مەنەدجەرى اسەت ماحامبەتوۆتى اڭگىمەگە تارتىپ كوردى.
ونىڭ ايتۋىنشا، اەس قۇرىلىسىنىڭ جوبالىق، قارجىلىق جانە ورنالاسۋ اۋماعى بويىنشا وتاندىق عالىمدار ۇلكەن جۇمىستار اتقارىپ، ءبىرقاتار جوبانى ەڭسەرگەن. وعان ءۇش جىلدان اسا ۋاقىت كەتكەن.
- اەس قۇرىلىسىنا الماتى وبلىسى جامبىل اۋدانى ۇلكەن اۋىلى جانىنداعى اۋماق پەرسپەكتيۆالى دەپ تانىلدى. وسى اۋداندا بىلىكتى مامانداردى تارتا وتىرىپ، الدىن الا زەرتتەۋلەر جۇرگىزىلدى، تاريحي جانە عىلىمي قۇجاتتار زەردەلەندى. اۋداندى باعالاۋ اەس سالۋ الاڭىن تاڭداۋ بويىنشا اتوم ەنەرگياسى جونىندەگى حالىقارالىق اگەنتتىكتىڭ (اەحا، ورىسشاسى - ماگاتە) باسشىلىعىندا كەلتىرىلگەن كريتەرييلەر نەگىزىندە جۇرگىزىلدى.
جالپى سيپاتتامالارى دا، ناقتى سيپاتتامالارى دا زەرتتەلدى. اتاپ ايتقاندا، جەر سىلكىنىسى مەن سۋ تاسقىنى سياقتى تابيعي اسەرلەر جانە انتروپوگەندىك اسەرلەر سياقتى قورشاعان ورتا تاراپىنان اەس-قا ىقتيمال اسەر ەتۋ جولدارى تالداندى.
وسى پارامەترلەر بويىنشا تالداۋ ۇلكەن اۋىلىنىڭ اۋدانى قازاقستاندا اەس سالۋ ءۇشىن جارامدى ەكەنىن كورسەتتى، - دەيدى ول.
دەگەنمەن مامان بۇل باعىتتا الدا تاعى تەحنيكالىق-ەكونوميكالىق نەگىزدەمە دايىندىعى بويىنشا جۇمىستار جۇرگىزىلەتىنىن، وندا اەس-تىڭ ورنالاسۋ اۋدانىنىڭ كوپتەگەن اسپەكتىسى قوسىمشا پىسىقتالىپ، ينجەنەرلىك ىزدەنىستەر جاسالاتىنىن باسا ايتادى.
ال وعان دەيىن قاراستىرىلاتىن تاعى ءبىر جۇمىس ساتىسى بار.
ءدال قازىرگى ۋاقىتتا، "قازاقستاندىق اتوم ەلەكتر ستانسيالارى" جشس-نىڭ جوبا باسقارۋ جونىندەگى باس مەنەدجەرىنىڭ ايتۋىنشا، اەس-تىڭ الەۋەتتى جەتكىزۋشىسىن تاڭداۋ بويىنشا جۇمىستار اتقارىلىپ جاتىر.
- اەس-تى جەتكىزۋشى كومپانيانى ۆەندور دەيمىز. باستاپقىدا التى ۆەندوردان قازىرگى زامانعى رەاكتورلاردىڭ جوبالىق ۇسىنىستارى قارالدى. تالداي كەلگەندە، «قىسقا تىزىمگە» نەمەسە «شورت پاراققا» تورتەۋى ءىلىندى. ولار - كورەيلىك KHNP، قىتايلىق CNNC، رەسەيلىك «روساتوم» جانە فرانسۋزداردىڭ EDF سىندى كومپانيالارى، - دەيدى مامان.
ەندىگى مىندەت - وسى تورتەۋدىڭ ىشىنەن ءبىر ۆەندوردى تاڭداپ الۋ.
https://www.youtube.com/watch؟v=bCQs6feUPco
اسەت ماحامبەتوۆتىڭ ايتۋىنشا، قازىرگى ۋاقىتتا وتاندىق ماماندار اتالعان تورتەۋدىڭ تاجىريبەسىن زەردەلەۋ ءۇشىن ساپارلار ۇيىمداستىرىلىپ، ناتيجەسىندە ءوز قورىتىندىلارىن ۇسىنۋدا.
"قىسقا تىزىمدەگى يادرولىق-ەنەرگەتيكالىق جابدىق وندىرۋشىلەرىنىڭ تاجىريبەسىن زەردەلەۋ اياسىندا ءبىزدىڭ ماماندار بيىلعى ماۋسىم ايىندا وڭتۇستىك كورەياعا، شىلدەدە فرانسياعا جانە تۇركياداعى «اككۋيۋ» اتوم ەلەكتر ستانسياسىنا، ال قىركۇيەكتە ۆەنگرياداعى «پاكش» اەس-نە ساپار جاسادى.
الەۋەتتى ۇسىنىستار مەن حالىقارالىق تاجىريبەنى زەردەلەۋ نەگىزىندە، ءار ساناتتاعى ەڭ جاقسى شەشىمدەردى تاڭداۋعا مۇمكىندىك بەرەتىن جابدىق وندىرۋشىلەر مەن مەردىگەر كومپانيالاردىڭ حالىقارالىق پۋلىن تارتۋ نەعۇرلىم ورىندى بولىپ تابىلادى.
الەمدە اەس سالۋ بويىنشا اعىمداعى جوبالاردى ىسكە اسىرۋ تاجىريبەسى بۇل ءتاسىل سالىنىپ جاتقان ستانسيالاردىڭ كوپشىلىگى ءۇشىن پايدالانىلاتىنىن كورسەتەدى".
ءبىزدىڭ بىلۋىمىزشە، ۆەندور تاڭدالعاننان كەيىنگى جۇمىس ساتىسى – مامانداردى ازىرلەۋ.
ياعني، اتومشى مامانداردى تاڭداپ الىنعان رەاكتورمەن جۇمىس ىستەۋدەگى بىلىكتىلىگى مەن ءبىلىمىن جەتىلدىرۋ جۇمىسى قولعا الىنادى. ال بۇل – بولاشاقتا جەكە تالقىلانار بولەك ۇلكەن تاقىرىپ.
