قونايەۆ قالاسىندا الماتى وبلىسىنىڭ اكىمى مارات سۇلتانعازييەۆ قىتايدىڭ YTO Express كومپانياسىنىڭ وكىلدەرىمەن كەزدەسۋ وتكىزدى، دەپ حابارلايدى Dalanews.kz

شاراعا كومپانيانىڭ ديرەكتورلار كەڭەسىنىڭ ءتوراعاسى يۋي ۆەيسزياو مىرزا جانە قازاقستاننىڭ لوگيستيكا سالاسىنىڭ وكىلدەرى قاتىستى. كەزدەسۋدى اشقان ءوڭىر باسشىسى YTO Express كومپانياسىمەن ارىپتەستىك بايلانىستار ورناعان ساتتەن بەرى بۇل ءتورتىنشى كەزدەسۋ ەكەنىن اتاپ ءوتتى.

ايتا كەتەيىك، وتكەن جىلدىڭ شىلدە ايىندا الماتى وبلىسى دەلەگاسياسىنىڭ قىتايعا رەسمي ساپارى بارىسىندا تاراپتار العاش رەت كەزدەسىپ، كومپانيانىڭ جوبالارىمەن جانە ۇسىنىستارىمەن تانىسقان بولاتىن. كەزدەسۋ اياسىندا تاراپتار الماتى وبلىسىندا YTO Express كومپانياسىنىڭ قاتىسۋىمەن زاماناۋي لوگيستيكالىق حاب سالۋ جوسپارىن تالقىلادى.

بۇل جوبا ەلەكتروندىق كوممەرسيا تاۋارلارىن قابىلداۋ، وڭدەۋ، ساقتاۋ جانە جەتكىزۋ بويىنشا وڭىرلىك جانە ۇلتتىق دەڭگەيدەگى لوگيستيكالىق الەۋەتتى ارتتىرۋعا مۇمكىندىك بەرەدى.

«الماتى وبلىسى كولىك-لوگيستيكا سالاسىندا زور الەۋەتكە يە. ءبىز وسى سالادا ينفراقۇرىلىمدى دامىتىپ، ينۆەستيسيا تارتۋعا نيەتتى سەرىكتەستەرگە جان-جاقتى قولداۋ كورسەتۋگە دايىنبىز»، – دەدى ءوڭىر باسشىسى.

ءوز كەزەگىندە يۋي ۆەيسزياو مىرزا كومپانيا قىزمەتى تۋرالى تانىستىرىلىم جاساپ، YTO Expressء-تىڭ قازاقستانداعى جوبالارى مەن دامۋ جوسپارلارىمەن ءبولىستى. ونىڭ ايتۋىنشا، الماتى وبلىسى كومپانيانىڭ جاھاندىق لوگيستيكالىق جەلىسىن دامىتۋ جولىنداعى ماڭىزدى ستراتەگيالىق باعىتتاردىڭ ءبىرى بولىپ تابىلادى.

كەزدەسۋ بارىسىندا سونىمەن قاتار، «قازپوشتا» اق جانە وزگە دە جەرگىلىكتى سەرىكتەستەرمەن بىرلەسكەن جوبالاردى ىسكە اسىرۋ ماسەلەلەرى دە تالقىلاندى. تاراپتار قازاقستاننىڭ وڭىرلىك لوگيستيكالىق حاب رەتىندە دامۋىنا ءوزارا ىنتىماقتاستىقتىڭ وڭ ىقپال ەتەتىنىنە سەنىم ءبىلدىردى.