بۇگىن قىزىلوردا وبلىسىنىڭ اكىمى نۇرلىبەك نالىبايەۆتىڭ قاتىسۋىمەن «ونەر ورتالىعىندا» 8 ناۋرىز – حالىقارالىق ايەلدەر كۇنىنە ارنالعان «انا – الەمنىڭ بەسىگى» اتتى سالتاناتتى شارا ءوتتى. ايماق باسشىسى انالار مەن قىز-كەلىنشەكتەردى كوكتەمنىڭ كوركەم مەرەكەسىمەن قۇتتىقتادى، دەپ حابارلايدى Dalanews.kz.

«پرەزيدەنتىمىز «ايەلدەر قاۋىمىنىڭ وتباسىنداعى، قوعام ومىرىندەگى جانە مەملەكەتتى جان-جاقتى دامىتۋ ىسىندەگى ءرولى وراسان زور. قىز-كەلىنشەكتەر وندىرىستە، شىعارماشىلىق جولىندا، ساياسات، بيزنەس جانە باسقا دا كوپتەگەن سالادا بيىك بەلەستەردى باعىندىرىپ كەلەدى»، – دەگەن بولاتىن. تاۋەلسىز قازاقستاننىڭ تولاعاي تابىستارى مەن سىر ءوڭىرىنىڭ بۇگىنگى جەتىستىكتەرىنىڭ بارلىعىندا ايەلدەر قاۋىمىنىڭ ءوز قولتاڭبالارى بار. انالارىمىزدىڭ رۋحىنان كۇش، ۇلاعاتىنان ءتالىم العان ارۋلارىمىز بۇگىندە ەكونوميكامىزدىڭ بارلىق سالاسىندا تابىستى ەڭبەك ەتەدى. وبلىس بويىنشا مەملەكەتتىك قىزمەتشىلەردىڭ 45 پايىزى، مەديسينا قىزمەتكەرلەرىنىڭ 88 پايىزى، ۇلاعاتتى ۇستازداردىڭ 78 پايىزى، جالپى بيۋدجەتتىك سالانىڭ 62 پايىزى، شاعىن جانە ورتا بيزنەستە ەڭبەك ەتەتىندەردىڭ 55 پايىزى قىز-كەلىنشەكتەر.

سىر ءوڭىرىنىڭ وسىپ-وركەندەۋىنە قوسقان ەلەۋلى ەڭبەكتەرىڭىز ءۇشىن سىزدەرگە بارشا سىر جۇرتشىلىعىنىڭ اتىنان شىنايى العىسىمدى، زور ريزاشىلىعىمدى بىلدىرەمىن. ءبىز، ەر-ازاماتتار سىزدەردى جوعارى باعالايمىز، قۇرمەتتەپ، قادىرلەيمىز. نازىك جاندارعا دەگەن ءبىزدىڭ ىقىلاسىمىز، نيەت-تىلەگىمىز ءاردايىم ەرەكشە. ءبىر قولىمەن بەسىكتى، ەكىنشى قولىمەن الەمدى تەربەگەن ارداقتى انالارىمىز ەل ەرتەڭىنە ءنار، تىرشىلىككە ءار بەرىپ كەلەدى. الداعى ۋاقىتتا دا ۇلتىمىزدىڭ باياندى بولاشاعى جولىندا ايانباي ەڭبەك ەتە بەرۋلەرىڭىزگە تىلەكتەسپىن!»، – دەدى نۇرلىبەك ماشبەك ۇلى.

سالتاناتتى شارادا شۋاقتى مەرەكە قارساڭىندا مەملەكەت باسشىسىنىڭ جارلىعىمەن «پاراسات»، «قۇرمەت» وردەندەرىمەن، «ەرەن ەڭبەگى ءۇشىن» مەدالىمەن ناگرادتالعان قىزىلورالىق ايەل-انالارعا ماراپاتتارى تابىستالدى.

سونىمەن قاتار، «مادەنيەت سالاسىنىڭ ۇزدىگى» توسبەلگىسى، قىزىلوردا وبلىسىنىڭ قۇرمەت گراموتاسى، وبلىس اكىمىنىڭ العىس حاتى مەرەكە يەلەرىنىڭ مەرەيىن اسىردى. ايتا كەتەيىك، اقوردادا وتكەن قابىلداۋدا «قىزىلوردا» تەلەارناسىنىڭ باس رەداكتورى تۇڭعىشبايەۆا اينۇر نۇرلان قىزى «ەرەن ەڭبەگى ءۇشىن» مەدالىن مەملەكەت باسشىسىنىڭ قولىنان الدى. بۇل – سىر وڭىرىندەگى ىسكەر ايەلدەر قاۋىمىنىڭ ادال ەڭبەگىنە بەرىلگەن لايىقتى باعا.

ايماقتا 48 مىڭنان استام كوپبالالى وتباسى بولسا، ونىڭ 17 مىڭعا جۋىعى «التىن القا» جانە «كۇمىس القا» يەگەرلەرى. التىن قۇرساقتى انالار دەموگرافيالىق احۋالدى جاقسارتۋعا زور ۇلەس قوسىپ كەلەدى. وڭىردە وتباسى ينستيتۋتىن دامىتۋ جانە انالاردى الەۋمەتتىك قولداۋ باعىتىندا جۇيەلى جۇمىستار جۇرگىزىلۋدە.

بەلگىلى كاسىپكەر مارات دۇيسەنبايەۆتىڭ دەمەۋشىلىگىمەن «اناعا تاعزىم» ورتالىعى سالىنعان. ورتالىقتا ەكى جىلدىڭ ىشىندە 40 مىڭعا جۋىق انا مەن قىز-كەلىنشەككە قىزمەت كورسەتىلدى.

سونىمەن قاتار، كەيىنگى جىلدارى بوي كوتەرگەن «وتباسى ورتالىعىندا» بولاشاقتا شاڭىراق كوتەرەتىن جاستار مەن جاس وتباسىلارعا پسيحولوگيالىق جانە قۇقىقتىق كەڭەستەر بەرىلىپ، مەملەكەتتىك باعدارلامالار مەن جوبالار بويىنشا اقپاراتتىق-تۇسىندىرمە جۇمىستارى جۇرگىزىلدى.

وبلىستاعى بارلىق 7 اۋداندا زاماناۋي ۇلگىدەگى «رۋحانيات ورتالىقتارى» سالىنىپ، پايدالانۋعا بەرىلدى. اتالعان ورتالىقتاردا مۋزەي مەن كىتاپحانا جۇمىس ىستەيدى.

ايتا كەتۋ كەرەك، وڭىردە سوڭعى ەكى جىل قاتارىنان «اناعا تاعزىم» رەسپۋبليكالىق فورۋمى وتكىزىلىپ كەلەدى.