Búgin Qyzylorda oblysynyń ákimi Nurlybek Nálibaevtyń qatysýymen «Óner ortalyǵynda» 8 naýryz – Halyqaralyq áielder kúnine arnalǵan «Ana – álemniń besigi» atty saltanatty shara ótti. Aimaq basshysy analar men qyz-kelinshekterdi kóktemniń kórkem merekesimen quttyqtady, dep habarlaidy Dalanews.kz.
«Prezidentimiz «Áielder qaýymynyń otbasyndaǵy, qoǵam ómirindegi jáne memleketti jan-jaqty damytý isindegi róli orasan zor. Qyz-kelinshekter óndiriste, shyǵarmashylyq jolynda, saiasat, biznes jáne basqa da kóptegen salada biik belesterdi baǵyndyryp keledi», – degen bolatyn. Táýelsiz Qazaqstannyń tolaǵai tabystary men Syr óńiriniń búgingi jetistikteriniń barlyǵynda áielder qaýymynyń óz qoltańbalary bar. Analarymyzdyń rýhynan kúsh, ulaǵatynan tálim alǵan arýlarymyz búginde ekonomikamyzdyń barlyq salasynda tabysty eńbek etedi. Oblys boiynsha memlekettik qyzmetshilerdiń 45 paiyzy, meditsina qyzmetkerleriniń 88 paiyzy, ulaǵatty ustazdardyń 78 paiyzy, jalpy biýdjettik salanyń 62 paiyzy, shaǵyn jáne orta bizneste eńbek etetinderdiń 55 paiyzy qyz-kelinshekter.
Syr óńiriniń ósip-órkendeýine qosqan eleýli eńbekterińiz úshin Sizderge barsha Syr jurtshylyǵynyń atynan shynaiy alǵysymdy, zor rizashylyǵymdy bildiremin. Biz, er-azamattar Sizderdi joǵary baǵalaimyz, qurmettep, qadirleimiz. Názik jandarǵa degen bizdiń yqylasymyz, niet-tilegimiz árdaiym erekshe. Bir qolymen besikti, ekinshi qolymen álemdi terbegen ardaqty analarymyz el erteńine nár, tirshilikke ár berip keledi. Aldaǵy ýaqytta da ultymyzdyń baiandy bolashaǵy jolynda aianbai eńbek ete berýlerińizge tilektespin!», – dedi Nurlybek Mashbekuly.
Saltanatty sharada shýaqty mereke qarsańynda Memleket basshysynyń Jarlyǵymen «Parasat», «Qurmet» ordenderimen, «Eren eńbegi úshin» medalimen nagradtalǵan qyzyloralyq áiel-analarǵa marapattary tabystaldy.
Sonymen qatar, «Mádeniet salasynyń úzdigi» tósbelgisi, Qyzylorda oblysynyń Qurmet gramotasy, oblys ákiminiń Alǵys haty mereke ieleriniń mereiin asyrdy. Aita keteiik, Aqordada ótken qabyldaýda «Qyzylorda» telearnasynyń bas redaktory Tuńǵyshbaeva Ainur Nurlanqyzy «Eren eńbegi úshin» medalin Memleket basshysynyń qolynan aldy. Bul – Syr óńirindegi isker áielder qaýymynyń adal eńbegine berilgen laiyqty baǵa.
Aimaqta 48 myńnan astam kópbalaly otbasy bolsa, onyń 17 myńǵa jýyǵy «Altyn alqa» jáne «Kúmis alqa» iegerleri. Altyn qursaqty analar demografiialyq ahýaldy jaqsartýǵa zor úles qosyp keledi. Óńirde otbasy institýtyn damytý jáne analardy áleýmettik qoldaý baǵytynda júieli jumystar júrgizilýde.
Belgili kásipker Marat Dúisenbaevtyń demeýshiligimen «Anaǵa taǵzym» ortalyǵy salynǵan. Ortalyqta eki jyldyń ishinde 40 myńǵa jýyq ana men qyz-kelinshekke qyzmet kórsetildi.
Sonymen qatar, keiingi jyldary boi kótergen «Otbasy ortalyǵynda» bolashaqta shańyraq kóteretin jastar men jas otbasylarǵa psihologiialyq jáne quqyqtyq keńester berilip, memlekettik baǵdarlamalar men jobalar boiynsha aqparattyq-túsindirme jumystary júrgizildi.
Oblystaǵy barlyq 7 aýdanda zamanaýi úlgidegi «Rýhaniiat ortalyqtary» salynyp, paidalanýǵa berildi. Atalǵan ortalyqtarda mýzei men kitaphana jumys isteidi.
Aita ketý kerek, óńirde sońǵy eki jyl qatarynan «Anaǵa taǵzym» respýblikalyq forýmy ótkizilip keledi.
