- قازاقستانداعى حالىقتىڭ قولداۋىنا، حالىقارالىق ۇيىمدارعا راقمەت ايتقىم كەلەدى. حالىق قولداۋى بولماسا، مەنى جوق قىلىپ جىبەرەتىن ەدى. سۇيەگىمدى تابا المايتىن ەدىڭدەر. راقمەت سول ءۇشىن! جاعدايدى تەلەديدار، راديو-گازەتتەن قاراپ وتىرمىن عوي. نازاربايەۆ تاقتان كەتسە دە، 5 ميلليمەتر وزگەرىس بار دەۋگە بولادى. ءبىراق الىپ بارا جاتقان وزگەرىس جوق. سوندىقتان ارى قاراي قوعامدىق جۇمىسپەن اينالىسا بەرەمىن، - دەدى بوقايەۆ.
ول 28 اقپاننان باستاپ جۇما سايىن "جالپىۇلتتىق ميتينگىگە شىعۋ" تۋرالى ۇسىنىس ايتتى. "ۇكىمەت اقىلعا كەلمەسە، 3 ساۋىردەن باستاپ الاڭداردا شاتىر تىگىپ وتىرامىز" دەدى ول.
تۇرمە مەرزىمى اياقتالاردان بۇرىن ازاتتىققا بەرگەن سۇحباتىندا ماكس بوقايەۆ قاماۋدان شىققاننان كەيىن بىردەن الاڭعا باراتىنىن ايتقان. ول بوساتىلاردان ءبىر كۇن بۇرىن "سوتتىڭ قاۋلى شىعارىپ، وزىنە ميتينگىگە بارۋعا، الەۋمەتتىك جەلى قولدانۋعا تىيىم سالعانىن" حابارلادى. بوقايەۆ سوت قاۋلىسىنا قول قويماعانىن، ءوزى دە، ادۆوكاتىنا دا سوت جايلى حابار بەرمەگەنىن ايتقان.
4 اقپاندا بوقايەۆ تۇرمە ماڭىندا جاقتاستارى الدىندا سويلەپ تۇرعان كەزدە پوليسيا سىرتتان باقىلاپ تۇردى. اينالادا اۆتوزاكتار دا بايقالدى.
بوقايەۆ جاقتاستارىن اتىراۋداعى يساتاي - ماحامبەت الاڭىنا بارىپ، "تازا اۋا جۇتىپ" سەرۋەندەپ قايتۋعا شاقىردى. ونى قارسى الۋعا الماتى، نۇر-سۇلتان، جاڭاوزەن جانە وزگە قالالاردان بەلسەندىلەر بارعان.
قاڭتار ايىندا اتىراۋ سوتى بوقايەۆقا ءۇش جىلعا اكىمشىلىك قاداعالاۋ تاعايىنداعان.
48 جاستاعى ماكس بوقايەۆ 2016 جىلعى قاراشادان بەرى تۇرمەدە وتىرعان. بەس جىل بۇرىن اتىراۋدا مىڭداعان ادام الاڭعا جينالىپ، جەردى شەتەلدىكتەرگە جالعا بەرۋگە قارسىلىق بىلدىرگەن. اتىراۋدا باستالعان نارازىلىق كەيىن ەلدىڭ باسقا ايماقتارىندا دا جالعاسىپ، بيلىك جەردى شەتەلدىكتەرگە جالعا بەرۋگە ۋاقىتشا موراتوريي جاريالاعان.
جەر رەفورماسىنا قارسى ميتينگىدەن سوڭ وعان قاتىسقان اتىراۋلىق بەلسەندىلەر – ماكس بوقايەۆ پەن تالعات ايان بەس جىلعا سوتتالدى. ولار "الەۋمەتتىك ارازدىق تۋدىردى"، "جالعان اقپارات تاراتتى" جانە "ميتينگ وتكىزۋ زاڭدارىن بۇزدى" دەپ ايىپتالدى. سوت 2018 جىلى ساۋىردە اياننىڭ ءوتىنىشى بويىنشا ونى قاماۋدان بوساتقان. 2019 جىلعى شىلدەدە اتىراۋداعى №2 قالالىق سوتى تالعات اياندى جازادان تولىق بوساتتى. ماكس بوقايەۆ "قاماۋدان ۋاقىتىنان بۇرىن شىعۋعا سۇرانبايتىنىن، ءوزىن تولىق اقتاۋدى تالاپ ەتەتىنىن" مالىمدەگەن.
قۇقىق قورعاۋشىلار ءىستىڭ ساياسيلانعانىن ايتىپ، ماكس بوقايەۆتى "ساياسي تۇتقىن" تىزىمىنە ەنگىزگەن. بەس جىل ىشىندە ەلدە كوپتەگەن اكسيالار مەن پيكەتتەر بولىپ، بەلسەندىلەر ساياسي تۇتقىندار ونىڭ ىشىندە ماكس بوقايەۆتى دا بوساتۋدى تالاپ ەتكەن. حالىقارالىق ۇيىمدار دا قازاقستان بيلىگىنەن ساياسي تۇتقىنداردى بوساتۋدى تالاپ ەتكەن.
