4 aqpanda Atyraýdaǵy ÝG-157/9 mekemesinen belsendi Maks Boqaev bosap shyqty. 2016 jylǵy jer mitingilerinen keiin 5 jyl túrmede otyrǵan "saiasi tutqyn" Maks Boqaevty túrme aldynan 20 shaqty jaqtasy, aqparat quraldary qarsy aldy.
- Qazaqstandaǵy halyqtyń qoldaýyna, halyqaralyq uiymdarǵa raqmet aitqym keledi. Halyq qoldaýy bolmasa, meni joq qylyp jiberetin edi. Súiegimdi taba almaityn edińder. Raqmet sol úshin! Jaǵdaidy teledidar, radio-gazetten qarap otyrmyn ǵoi. Nazarbaev taqtan ketse de, 5 millimetr ózgeris bar deýge bolady. Biraq alyp bara jatqan ózgeris joq. Sondyqtan ary qarai qoǵamdyq jumyspen ainalysa beremin, - dedi Boqaev.
Ol 28 aqpannan bastap juma saiyn "jalpyulttyq mitingige shyǵý" týraly usynys aitty. "Úkimet aqylǵa kelmese, 3 sáýirden bastap alańdarda shatyr tigip otyramyz" dedi ol.
Túrme merzimi aiaqtalardan buryn Azattyqqa bergen suhbatynda Maks Boqaev qamaýdan shyqqannan keiin birden alańǵa baratynyn aitqan. Ol bosatylardan bir kún buryn "sottyń qaýly shyǵaryp, ózine mitingige barýǵa, áleýmettik jeli qoldanýǵa tyiym salǵanyn" habarlady. Boqaev sot qaýlysyna qol qoimaǵanyn, ózi de, advokatyna da sot jaily habar bermegenin aitqan.
4 aqpanda Boqaev túrme mańynda jaqtastary aldynda sóilep turǵan kezde politsiia syrttan baqylap turdy. Ainalada avtozaktar da baiqaldy.
Boqaev jaqtastaryn Atyraýdaǵy Isatai - Mahambet alańyna baryp, "taza aýa jutyp" serýendep qaitýǵa shaqyrdy. Ony qarsy alýǵa Almaty, Nur-Sultan, Jańaózen jáne ózge qalalardan belsendiler barǵan.
Qańtar aiynda Atyraý soty Boqaevqa úsh jylǵa ákimshilik qadaǵalaý taǵaiyndaǵan.
48 jastaǵy Maks Boqaev 2016 jylǵy qarashadan beri túrmede otyrǵan. Bes jyl buryn Atyraýda myńdaǵan adam alańǵa jinalyp, jerdi sheteldikterge jalǵa berýge qarsylyq bildirgen. Atyraýda bastalǵan narazylyq keiin eldiń basqa aimaqtarynda da jalǵasyp, bilik jerdi sheteldikterge jalǵa berýge ýaqytsha moratorii jariialaǵan.
Jer reformasyna qarsy mitingiden soń oǵan qatysqan atyraýlyq belsendiler – Maks Boqaev pen Talǵat Aian bes jylǵa sottaldy. Olar "áleýmettik arazdyq týdyrdy", "jalǵan aqparat taratty" jáne "miting ótkizý zańdaryn buzdy" dep aiyptaldy. Sot 2018 jyly sáýirde Aiannyń ótinishi boiynsha ony qamaýdan bosatqan. 2019 jylǵy shildede Atyraýdaǵy №2 qalalyq soty Talǵat Aiandy jazadan tolyq bosatty. Maks Boqaev "qamaýdan ýaqytynan buryn shyǵýǵa suranbaitynyn, ózin tolyq aqtaýdy talap etetinin" málimdegen.
Quqyq qorǵaýshylar istiń saiasilanǵanyn aityp, Maks Boqaevty "saiasi tutqyn" tizimine engizgen. Bes jyl ishinde elde kóptegen aktsiialar men piketter bolyp, belsendiler saiasi tutqyndar onyń ishinde Maks Boqaevty da bosatýdy talap etken. Halyqaralyq uiymdar da Qazaqstan biliginen saiasi tutqyndardy bosatýdy talap etken.
