«ون جىلداي ۋاقىت سالىپ وزدەرىڭىزبەن قايتا قاۋىشقانىما قۋانىشتىمىن. تۇركىستاندى دامىتۋ باعىتىندا جۇمىستار اتقارىلىپ جاتىر. ءبىز سول جۇمىستاردى جالعاستىرىپ قانا قويماي، قارقىنىن ارتتىرامىز. ەلباسىمىز نۇرسۇلتان نازاربايەۆتىڭ قازاقستاندىقتاردىڭ ءال-اۋقاتىن ارتتىرۋ باعىتىنداعى تاپسىرمالارى تۇركىستان وبلىسىنىڭ الەۋمەتتىك-ەكونوميكالىق دامۋىنا تىكەلەي اسەر ەتەدى.
سەبەبى وبلىسىمىز كوپبالالى انالار سانى بويىنشا رەسپۋبليكادا الدىڭعى قاتاردا تۇر. ءار بالاعا 21 مىڭ تەڭگە كولەمىندە جاردەماقى بەرىلۋى - جەرلەستەرىمىزگە وڭ ىقپالىن تيگىزەتىنى ءسوزسىز.
ءبىز وسى الەۋمەتتىك كومەكتىڭ بەرىلۋ شارتى مەن مەرزىمى تولىق جۇيەلەنگەنشە وبلىستا الەۋمەتتىك زەرتتەۋ جۇرگىزىپ، كومەككە مۇقتاج وتباسىلاردى انىقتاۋىمىز كەرەك.
ءاربىر اۋدان، قالا اكىمدەرى وزدەرى باسقاراتىن اۋماقتاعى كوپبالالى جانە از قامتىلعان وتباسىلاردى انىقتاسىن. سول تۇرعىنداردى كومەكپەن جانە جۇمىسپەن قامتۋ شارالارى كۇشەيتىلسىن. جۇمىس توبىنا «نۇر وتان» پارتياسىنىڭ وكىلدەرى دە كىرىپ، ءتىزىمنىڭ ءادىل جاسالۋىن قاداعالاۋى قاجەت. تۇرعىندار الەۋمەتتىك كومەك الۋ ءۇشىن مەكەمەلەردىڭ تابالدىرىعىن توزدىرماي، جاردەماقىنى ۋاقتىلى الۋى ءتيىس»، - دەدى ءومىرزاق شوكەيەۆ.
سونىمەن بىرگە، ءوڭىر باسشىسى بيۋدجەتتىك مەكەمەلەردەگى ەڭ تومەنگى جالاقى الاتىن جۇمىسشىلاردىڭ سانى مەن ولارعا جۇمسالاتىن قارجىنى تولىق ەسەپتەۋ جونىندە تاپسىرما بەردى. جەرگىلىكتى اتقارۋشى ورگانداردا قىزمەت ەتەتىن مامانداردىڭ جالاقىسىن كوتەرۋ ءۇشىن ۇيىمداردىڭ شىعىستارىن وڭتايلاندىرۋ جانە ۇنەمدەۋ شارالارى اتقارىلىپ، فاكتورلى-بالل شكالاسى جۇيەسى ەنگىزىلەتىنىن ايتتى.
سونداي-اق كوپبالالى وتباسىلاردى تۇرعىن ۇيمەن قامتۋ، تومەن پايىزبەن باسپانا بەرۋ باعىتىندا جۇمىستار جۇيەلەنەدى. وڭىردەگى قۇرىلىس جۇمىستارىنا وتاندىق ماتەريالدار قولدانىلىپ، جەرگىلىكتى تۇرعىنداردىڭ جۇمىسپەن قامتىلۋى دا باقىلاۋدا بولادى. وبلىس باسشىسى جۇرتشىلىقتى وسى باعىتتا بىرلەسىپ جۇمىس ىستەۋگە شاقىردى.
