ق ر سىرتقى ىستەر ۆيسە-مينيسترى ەرمەك كوشەربايەۆ الەۋمەتتىك جەلىلەردە تارالىپ جاتقان اقپاراتتى جوققا شىعارىپ وتىر. ونىڭ سوزىنە قاراعاندا، قازاقستانعا ەسكى زاۋىتتار كوشىرىلمەيدى.
– مەنىڭ ەستۋىمشە، بلوگەرلەر تاراتاتىن جانە WhatApp-تا جۇرگەن روليكتەردە «قازاقستانعا 55 ەسكى زاۋىت كوشىرىلەدى» دەگەن اڭگىمە بار. ونداي باعدارلاما جوق. ەسكى زاۋىتتاردى ەشكىم اكەلمەيدى. ونداي وي بولسا دا، ءبىزدىڭ كوميسسيا وعان جول بەرمەيدى. سەبەبى بارلىق جوبانى ءبىز ءوزىمىز تاڭدايمىز، ءتيىستى مەملەكەتتىك ساراپتامادان دا وتكىزىپ تۇرامىز، – دەپ اتاپ كورسەتتى كوشەربايەۆ.
ەكى ەلدىڭ بىرلەسكەن 55 جوباسىنا بىرنەشە مينيسترلىك جاۋاپتى. ولار – يندۋستريا جانە ينفراقۇرىلىمدىق دامۋ مينيسترلىگى (27 جوبا)، اۋىل شارۋاشىلىعى مينيسترلىگى (7 جوبا)، ەنەرگەتيكا مينيسترلىگى (20 جوبا). سونداي-اق، ءبىر جوبا «استانا» حالىقارالىق قارجى ورتالىعىنا تيەسىلى.
يندۋستريا جانە ينفراقۇرىلىمدىق دامۋ ۆيسە-مينيسترى امانياز ەرجانوۆتىڭ ايتۋىنشا، بارلىق جوبا قازاقستان مەن جۇڭگو ۇكىمەتى اراسىنداعى كەلىسىمنىڭ نەگىزىندە قولعا الىنىپ وتىر. وسى ۋاقىتقا دەيىن 8 جوبا ىسكە قوسىلدى.
– ماسەلەن، بيىل ۇلكەن ديامەترلى بولات قۇبىرلارىن شىعاراتىن كاسىپورىن پايدالانۋعا بەرىلەدى. سول جەردە 300 جاڭا جۇمىس ورنى اشىلادى. بۇدان بولەك، وسى جوبالاردىڭ اياسىندا جەرگىلىكتى مامانداردى وقىتۋ، شەتەلدىك ماماندارمەن تاجىريبە الماسۋ جانە قازاقستاندىق جۇمىسشىلاردىڭ بىلىكتىلىگىن ارتتىرۋ جوسپارلانعان. سونىڭ ناتيجەسىندە شەتەلدىك جۇمىس كۇشى ايتارلىقتاي ازايادى، – دەدى ەرجانوۆ بۇگىنگى باسپا ءسوز ءماسليحاتىندا.
ۆيسە-مينيستردىڭ سوزىنە قاراعاندا، ءاربىر جوبانىڭ قۇرىلىسىنا جانە ول پايدالانۋعا بەرىلگەن العاشقى كەزەڭدە شەتەلدىك ماماندار تارتىلادى. ارتىنان جەرگىلىكتى مامانداردى وقىتۋ ارقىلى شەتەلدىك قىزمەتكەرلەردى الماستىرۋ جوسپارلانعان.
– مىسالى، وسى ۋاقىتقا دەيىن پايدالانۋعا بەرىلگەن بارلىق كاسىپورىندا، كوبىنەسە، ءوزىمىزدىڭ ماماندارىمىز جۇمىس ىستەپ ءجۇر. اقتوعاي تاۋ-كەن كومبيناتىن الايىق، باس كەزىندە ول جەردە قىتايلىق ماماندار قىزمەت ەتتى. بۇگىندە كومبيناتتىڭ باسشىلىق قۇرامىنا وتاندىق ماماندار عانا كىرەدى، – دەپ اتاپ كورسەتتى ەرجانوۆ.
بىرلەسكەن 55 جوبانىڭ جالپى قۇنى – 27،5 ميلليارد دوللار. ولار كولىك قۇراستىرۋ، قۇرىلىس، اۋىل شارۋاشىلىعى جانە اگروونەركاسىپ ونىمدەرىن شىعارۋ، حيميا مەن فارماسيەۆتيكا، مۇناي-گاز، ەنەرگەتيكا جانە تاعى باسقا سالالاردى قامتيدى.
– وسى جوبالاردىڭ نەگىزىندە ءبىرقاتار جوعارى تەحنولوگيالىق كاسىپورىندار قۇرىلادى دەگەن جوسپارىمىز بار. سونىڭ ارقاسىندا جوعارى ساپالى وتاندىق ونىمدەر شىعارىلادى، – دەپ اتاپ كورسەتتى ەرجانوۆ.
