ستيپەنديالىق باعدارلاما شەڭبەرىندە ۆەنگريا ۇكىمەتى قازاقستاندىقتارعا كەلەسى باعدارلامالار بويىنشا 250 گرانت ۇسىندى: باكالاۆر دارەجەسى - 110، ماگيستراتۋرا - 90، دوكتورانتۋرا - 20، باكالاۆريات جانە ماگيستراتۋرا – 5 جانە 6 جىلعا دەيىنگى وقۋ مەرزىمى بويىنشا - 30 ورىن. گرانت كەلەسى شىعىنداردى قامتاماسىز ەتەدى: اقىسىز وقۋ، اي سايىنعى ستيپەنديا، جاتاقحانادا تۇرۋ جانە مەديسينالىق ساقتاندىرۋ. ۇكىمەتارالىق گرانتتىڭ تالابى - ستيپەنديات شەتەلدە وقۋىن اياقتاعاننان كەيىن قازاقستانعا ورالۋى جانە 3 جىل ۇزدىكسىز ەڭبەك قىزمەتىن جۇزەگە اسىرۋى قاجەت.
«حالىقارالىق باعدارلامالار ورتالىعى» اق ۇكىمەتارالىق گرانتتاردىڭ اكىمشىسى رەتىندە ءوتىنىش بەرۋشىلەردىڭ قۇجاتتارىن قابىلدادى.
كونكۋرسقا قۇجاتتار قابىلداۋ ناتيجەلەرى بويىنشا 1093 ءوتىنىش قابىلداندى. ونىڭ 670ء-ى باكالاۆرياتقا، 280ء-ى ماگيستراتۋراعا، 94ء-ى باكالاۆريات پەن ماگيستراتۋراعا، 24ء-ى ءتىل كۋرستارىنا قاتىسۋعا جانە 25ء-ى دوكتورانتۋرا باعدارلاماسى بويىنشا وقۋعا تۇسۋگە بەرىلگەن وتىنىشتەر.
2021 جىلدان باستاپ ۇمىتكەرلەردى ىرىكتەۋدىڭ جاڭا جۇيەسى ەنگىزىلدى. قۇرامىندا كەمىندە 5 مۇشەدەن تۇراتىن تاۋەلسىز ساراپتاما كوميسسياسىمەن ونلاين رەجيمدە جەكە سۇحبات جۇرگىزىلەدى جانە بۇل سۇحبات اۋديو-ۆيدەو جازبامەن سۇيەمەلدەنەدى. ساراپشىلار ۇمىتكەرلەردى ءۇش كريتەريي بويىنشا باعالايدى:
1) موتيۆاسيا دەڭگەيى، تاڭداعان ماماندىعىنا سەنىمدىلىك، وقۋعا دەگەن تالپىنىسىن دالەلدەۋ؛
2) وقۋداعى جانە/نەمەسە تاڭداعان ماماندىعى/كاسىبي سالاسىنداعى تەوريالىق (بازالىق) ءبىلىم دەڭگەيى جانە جەتىستىكتەرى
3) ويلاۋ قابىلەتى جانە ويىن ەركىن جەتكىزۋ مۇمكىندىگى، جەكە قاسيەتتەرى، ءارتۇرلى جاعدايدا ماسەلەلەردى شەشۋ داعدىلارى.
جەكە سۇحبات، وقۋ جەتىستىكتەرىن باعالاۋ جانە وقىتۋ ءتىلىن ءبىلۋ ناتيجەلەرى بويىنشا قورىتىندى كوميسسيا مۇشەلەرى Stipendium Hungaricum ستيپەندياسىن تاعايىنداۋ تۋرالى شەشىم قابىلدايدى.
ۇپايلار تەڭ بولعان جاعدايدا، تومەندەگى جاعدايلار بويىنشا ارتىقشىلىق بەرىلەدى:
1) جەتىم بالالار مەن اتا-اناسىنىڭ قامقورلىعىنسىز قالعان بالالار؛
2) مەديسينالىق قورىتىندى بويىنشا وقۋعا كەدەرگىسى جوق بالا كەزىنەن مۇگەدەكتەر جانە مۇگەدەك بالالار؛
3) كوپبالالى وتباسىلاردىڭ بالالارى؛
4) قابىلداۋشى ەلدىڭ ۋنيۆەرسيتەتتەرىنەن شاقىرۋ العان، سونداي-اق قابىلداۋشى ەلدىڭ ۋنيۆەرسيتەتتەرىندە وقيتىن ۇمىتكەرلەر.
بۇل فورمات ۇمىتكەرلەردى كونكۋرستىق ىرىكتەۋدىڭ ساپاسىن جاقسارتۋعا عانا ەمەس، سونىمەن قاتار تاڭداۋ جۇيەسىن اشىق ءارى قولجەتىمدى ەتۋگە مۇمكىندىك بەرەدى.
«حالىقارالىق باعدارلامالار ورتالىعى» اق باسپا ءسوز قىزمەتى
