بيىل ءۇشىنشى رەت ۇيىمداستىرىلعان بايقاۋعا ينستيتۋتتىق تۋردان ۇزدىك دەپ تانىلعان جەتى ەدۆايزەر قاتىستى. ايتۋلى شارادا ءقازۇتۋ-دىڭ تاربيە جۇمىسى جونىندەگى پرورەكتور گۇلنار سارسەنبەكوۆا، ءا. ماشاني اتىنداعى بازالىق ءبىلىم بەرۋ ينستيتۋتىنىڭ ديرەكتورى ءرات بەردىبايەۆ جانە ىشكى اۋديت دەپارتامەنتى ديرەكتورىنىڭ ورىنباسارى گۇلنارا مىقتىبايەۆالار قازىلىق جاساعانىن ايتا كەتۋىمىز كەرەك.
ەدۆايزەرلەر جۇمىسىن قولداۋ، تاجىريبە الماسۋ جانە ولاردى ىنتالاندىرۋ ماقساتىندا وتكىزىلگەن بۇل شارادا ۇزدىكتەردى انىقتاۋ وڭاي بولعان جوق. كەز كەلگەن ەدۆايزەر جان-جاقتى ءبىلىمدى، بىلىكتى، ونەرلى بولۋى شارت. ەدۆايزەر – ءوز ستۋدەنتتەرىن تەك ءبىلىم، عىلىمعا عانا ەمەس، سونىمەن قاتار جان-جاقتى تۇلعا بولىپ قالىپتاسۋىنا كۇش سالاتىنى بەلگىلى. سونىمەن، «ەڭ ۇزدىك ەدۆايزەر – 2015» بايقاۋىنىڭ باس جۇلدەسى اقپاراتتىق جانە تەلەكوممۋنيكاسيالىق تەحنولوگيالار ينستيتۋتىنىڭ ەدۆايزەرى – سالتانات نۇرالىقىزىنا بۇيىردى. ءبىرىنشى ورىندى ءا. بۇركىتبايەۆ اتىنداعى ونەركاسىپتىك ينجەنەريا ينستيتۋتىنىڭ ەدۆايزەرى – شولپان قابىجانقىزىنا بۇيىرسا، ەكىنشى ورىنعا تاۋ-كەن مەتاللۋرگيا ينستيتۋتىنىڭ ەدۆايزەرى – رايسا قۇلماحان قىزى قول جەتكىزدى. ال ءۇشىنشى ورىنعا ەكونوميكا جانە بيزنەس ينستيتۋتىنىڭ ەدۆايزەرى – جانار سەيىلحان قىزى تابان تىرەدى.
ۋنيۆەرسيتەت رەكتورىنىڭ قولداۋىمەن، عىلىمي كەڭەستىڭ شەشىمىنە سايكەس جىل سايىن «ەڭ ۇزدىك ەدۆايزەر» بايقاۋىنىڭ جۇلدەگەرلەرىنە وقىتۋشى-پروفەسسورلار قۇرامىنا ديففەرەنسيالدىق ۇستەم اقى بەرىلىپ وتىرادى. ۋنيۆەرسيتەتتىڭ قىزمەتكەرلەر كاسىپوداعى بايقاۋعا قولداۋ كورسەتىپ، بۇگىنگى فينالدىق سايىسقا قاتىسقان بارلىق ەدۆايزەرگە جازعى ماۋسىمعا ۋنيۆەرسيتەتتىڭ ىستىقكولدە ورنالاسقان «سامال» دەمالىس ۇيىنە ىنتالاندىرۋ جولدامالارىن بەردى.
جۇلدىز باعاشاروۆا، قازۇتۋ-دىڭ باسپا ءسوز حاتشىسى
