قازاقستانداعى تاكسيدە قىز-كەلىنشەكتەردىڭ قانداي قيىندىقتارعا تاپ بولاتىنى بارىمىزگە بەلگىلى: ورىنسىز ازىلدەر، تانىسۋ ۇسىنىستارى، كەيدە ءتىپتى قولمەن ۇستاپ قالۋعا دەيىن بارادى. بۇل كوپتەن بەرى جاسىرىن، ايتىلماي كەلگەن ماسەلە ەدى، - دەپ حابارلايدى Dalanews.kz. 

«جاڭا ادامدار» قوزعالىسىنىڭ «TUMAR» توبى ماسەلەنىڭ قانشالىقتى ۋشىعىپ تۇرعانىن انىقتاۋعا شەشىم قابىلدادى.

ناتيجەسى: جاعداي وتە اۋىر. ءبىرىنشى كۇنى جۇرگىزىلگەن 7 ساپاردىڭ بارىندە قىزدارعا ورىنسىز سوزدەر ايتىلىپ، جابىسۋلار بولعان. ەكىنشى كۇنى دە جاعداي وڭالمادى: ءتورت ساپاردىڭ ۇشەۋىندە قىزدارعا قىرىنداۋلار جاسالدى. سونىڭ ىشىندە ءبىر وقيعا ءتىپتى توتەنشە جاعدايعا اينالدى... (ۆيدەوسى وسى تۇستا). 

تاكسي جۇرگىزۋشىسى ەسىكتەردى جاۋىپ، جولاۋشىنى باسقا جاققا الىپ كەتكەن.

وسى كەزدە كولىكتى باقىلاپ جۇرگەن «TUMAR» جوباسىنىڭ بەلسەندىلەرى جاعدايدى باقىلاۋعا الىپ، تاكسيدى توقتاتۋعا ارەكەت جاسايدى. ءبىراق جۇرگىزۋشى قاشۋعا تىرىسىپ، كىشكەنە قۋعىنعا تۇسەدى. ابىروي بولعاندا، جولاۋشى قۇتقارىلدى.

تاكسي جۇرگىزۋشىسى – 1995 جىلى تۋعان ەربولات امانجول ۇلى.

سىرتتاي قاراساڭ، ەشبىر وعاشتىعى جوق، قاراپايىم ادام سياقتى. ءبىراق كامەراعا ءتۇسىپ قالعان ارەكەتتەرى ءبارىن كورسەتىپ تۇر: قىزعا ورىنسىز سوزدەر ايتىپ، ءتىپتى قول تيگىزۋگە تىرىسقان.

بۇل جاعدايعا پىكىر ايتۋدىڭ قاجەتى دە جوق...

قۋعىن كەزىندە جۇرگىزۋشىنىڭ كولىك ءنومىرى ءتۇسىپ قالعان، وسى ارقىلى ونىڭ كىم ەكەنى انىقتالدى. «جاڭا ادامدار» قوزعالىسىنىڭ بەلسەندىلەرى بۇل وقيعا بويىنشا پوليسياعا ارىز جازىپ، ءىستى زاڭدى تۇردە شەشۋدى تالاپ ەتتى.

ال الگى جۇرگىزۋشى ءوز ءنومىرىن قايتارىپ العىسى كەلسە، الماتىداعى قوزعالىس كەڭسەسىنە كەلىپ، الىپ كەتە الادى. ءبىراق وعان باتىلى جەتە مە ەكەن؟

الەۋمەتتىك تاجىريبەنىڭ ماقساتى قانداي؟

«TUMAR» قوزعالىسىنىڭ بەلسەندىسى سلەمعالي شاكيزادى قىز-كەلىنشەكتەرگە ۇندەۋ تاستايدى:

«زورلىق-زومبىلىقتى، قۋدالاۋدى جاسىرماي، اشىق ايتۋ كەرەك. سىزدەردىڭ باستارىڭىزدان وتكەن جاعدايلار تۋرالى بولىسىڭىزدەر، #tumarsafetaxi حەشتەگىمەن الەۋمەتتىك جەلىلەردە جازبا قالدىرىڭىزدار. قوعامعا ءقاۋىپتى جۇرگىزۋشىلەردىڭ اتتارىن، كولىك نومىرلەرىن جاريا ەتۋ كەرەك. ولار جۇرتتىڭ الدىندا ماسقارا بولۋدان قورقادى. سوندىقتان ءبىز ولاردى بۇكىل ەلگە كورسەتۋىمىز كەرەك. قازاقستان ولاردى تانۋى ءتيىس!»