ونىڭ ايتۋىنشا، 1، 2، 3-كلاسستاعى حيميالىق زاتتارمەن تەك ارنايى ليسەنزياسى بار مامانداردىڭ دەزينسەكسيا جاساۋىنا بولادى. ال ءۇي جاعدايىندا ءوز بەتىنشە 4-ساناتتاعى پرەپاراتتارمەن جۇمىس ىستەۋگە رۇقسات ەتىلگەن.
– جالپى زالاسىزداندىرۋ جۇمىستارى مىندەتتى تۇردە رەسپۋبليكالىق رەەستر تىزىمىندە بار پرەپاراتتارمەن جۇرگىزىلەدى. ياعني، سول تىزىمدە جوق زاتتاردى رەسپۋبليكا ايماعىندا پايدالانۋعا قاتاڭ تىيىم سالىنعان. رەەستر ءتىزىمى ينتەرنەت جەلىسىندە بار، – دەدى ءاسيما جارىلعاسوۆا.
ايتا كەتەيىك، جۋىردا اقتاۋ قالاسىنىڭ ەكى تۇرعىنى حيميالىق ۋلانۋدان قايتىس بولدى. قۇزىرلى ورگاندار انىقتاعانداي اقتاۋ قالاسىنىڭ تۇرعىنى «كۆيكفوس» پرەپاراتىمەن (جاندىكتەرگە قارسى پرەپارات) كورشىلەرىن ەسكەرتپەستەن ءوز پاتەرىن دەزينسەكسيالاعان. پاتەرىن زالالسىزداندىرىپ بولعان سوڭ، ءۇيىن كىلتتەپ باسقا شاعىناۋدانعا كەتكەن. كەيىن كورشىلەرىنىڭ دەنساۋلىعى ناشارلاي باستاعان. سالدارىنان كورشى ايەل مەن قىزى كوز جۇمدى.
سپيكەردىڭ مالىمەتىنشە، وڭىردە جاندىكتەردى ۋلاۋ پرەپاراتتارىن ءۇي جاعدايىندا قولدانىپ، سالدارىنان قايعىلى وقيعا ورىن العان فاكتىلەر 2017-2018-2019 جىلدارى تىركەلگەن.
وسى باعىتتا جەرگىلىكتى اتقارۋشى ورگاندار مەن سانيتاريالىق-ەپيدەميولوگيالىق قىزمەتىنىڭ ماماندارى تۇرعىندار اراسىندا ۇنەمى پروفيلاكتيكالىق جۇمىستاردى جۇرگىزىپ وتىرادى.
– قالاداعى بارلىق تۇرعىن ۇيلەردىڭ تازالىعىنا جاۋاپتى مەكەمەلەردە زالاسىزداندىرۋمەن اينالىساتىن ۇيىمداردىڭ ءتىزىمى بار. ماسەلەن، اقتاۋدا تازالاۋ جۇمىستارىن جۇرگىزۋگە رۇقساتى بار 8 مەكەمە جۇمىس ىستەيدى. قالا تۇرعىندارى كەز كەلگەن ۋاقىتتا ارنايى ۇيىمداردىڭ قىزمەتىنە جۇگىنە الادى. ەگەر ۇيدە زارارسىزداندىرۋ جۇرگىزىلسە، تۇرعىندار مىندەتتى تۇردە ونى كورشىلەرىنە ەسكەرتىپ، پودەزگە حابارلاندىرۋ ءىلۋى قاجەت. بۇل – ۋلانۋ جاعدايلارىنىڭ الدىن الادى، – دەدى ءاسيما جارىلعاسوۆا.
