ۇيدەن شىعارۋ، اليمەنت جانە قارىز داۋلارىندا سوت شەشىمدەرىنىڭ ورىندالۋى ءجيى كەشىگىپ جاتادى. وسى ماسەلەنى رەتتەۋ ءۇشىن ءماجىلىس اتقارۋشىلىق ءىس جۇرگىزۋدى جەتىلدىرۋگە ارنالعان زاڭ جوباسىن ءبىرىنشى وقىلىمدا ماقۇلدادى، دەپ حابارلايدى Dalanews.kz.
دەپۋتات ناتاليا دەمەنتيەۆانىڭ ايتۋىنشا، جاڭا قۇجات سوت شەشىمدەرىن ناقتى ءارى ۋاقىتىندا ورىنداتۋعا باعىتتالعان. سونىڭ ىشىندە، ۇيدەن شىعارۋ كەزىندە بورىشكەرگە الدىن الا 10 كۇن بۇرىن ەسكەرتۋ جىبەرۋ ءتارتىبى قاراستىرىلىپ وتىر.
زاڭ جوباسىندا تاعى ءبىر ماڭىزدى وزگەرىس – وندىرىلگەن اقشانى اۋدارۋ مەرزىمىن ناقتىلاۋ. ءقازىر مۇنداي تالاپ جوق، بۇل اسىرەسە اليمەنت الاتىن بالالاردىڭ جاعدايىنا كەرى اسەر ەتىپ وتىر.
سونداي-اق بورىشكەرلەر تىزىمىنە ازاماتتاردى نەگىزسىز ەنگىزۋ ماسەلەسى دە قايتا قارالادى. ەندى بۇل تىزىمگە تەك سوت شەشىمىن ادەيى ورىنداماعان ادامدار عانا ەنگىزىلەدى.
بۇدان بولەك، جالعان مەكەنجاي كورسەتىپ، جاۋاپكەرشىلىكتەن جالتارعان كومپانيالارعا قاتىستى باقىلاۋ كۇشەيتىلەدى. ال بورىشكەرلەردىڭ مۇلكىن ساتۋ كەزىندە ەلەكتروندى اۋكسيونداردىڭ اشىقتىعى ارتىپ، قاتىسۋشىلارعا باعانى كوتەرۋگە قوسىمشا ۋاقىت بەرىلەدى.
جالپى، ۇسىنىلىپ وتىرعان وزگەرىستەر سوت شەشىمدەرىنىڭ ورىندالۋىن جەدەلدەتىپ، ازاماتتاردىڭ قۇقىقتارىن ءتيىمدى قورعاۋعا باعىتتالعان.
