TikTok جەلىسىندە @FinRunner دەگەن نيكپەن تىركەلگەن اۆتوبلوگەر ۋتيلالىمدى الىپ تاستاۋعا قاتىستى پەتيسيا جاريالاعان اۆتورلاردىڭ ايتقانىن اشكەرەلەيتىن روليك سالدى. قولدانۋشى ۋتيليزاسيالىق الىمنىڭ اۆتوكولىك نارىعىنا اسەرىن ناقتى سانمەن ەسەپتەپ بەردى. ناتيجەسىندە «ۋتيلالىمدى الىپ تاستاعاننان كەيىن اۆتوكولىك باعاسى 3،5-4 ملن تەڭگەگە ارزاندايدى» دەگەن ءسوزدىڭ شىندىققا اسا جاناسپايتىن كورسەتتى.
«ۋتيلالىم الىپ تاستاعان سوڭ، اۆتونارىق قانشالىقتى ارزاندايدى؟» دەگەن سۇراققا جاۋاپ ىزدەگەن اۆتور مىناداي جاعدايدى الىپ قاراستىردى. بلوگەر ەسەپتەۋگە كولەمى 2 ليترگە دەيىنگى كولىكتى الدى. پەتيسيا اۆتورلارى ۋتيلالىمدى الىپ تاستاعان جاعدايدا گرۋزيا، دۋباي نە قىتايدان الىپ كەلگەن كولىك باعاسى 3،4-4 ملن تەڭگەگە شىعادى دەيدى. روليكتە ۋتيلالىمنىڭ قازىرگى مولشەرلەمەسى جازىلعان. وندا 2 ليترلىك ماشينانىڭ تولەمى 646 مىڭ تەڭگە بولادى دەلىنگەن. دەمەك، ارزانداسا، وسىنشا سوماعا عانا ارزاندايدى. وعان قوسا يمپورتتالىپ كەلەتىن كولىكتىڭ لوگيستيكاعا كەتەتىن شىعىن مەن باستاپقى تىركەۋ تولەمى بار.
«ۋتيليزاسيالىق الىم اۆتونارىققا اسا قاتتى اسەر ەتپەيدى. الىپ تاستاعان سوڭ بارلىعى اياق-استى ادەمى سamry نە ارزان Cobalt-قا ءمىنىپ كەتەدى دەپ سەنۋدىڭ كەرەگى جوق. باسپەن ويلانىپ قاراساق، ساندار كوز الدىڭىزدا تۇر. تەگىن ەشتەڭە جوق. قىتايدان 3 ميلليونعا ELANTRA الام دەپ ويلاماڭىز»، — دەلىنگەن روليكتە.
بلوگەردىڭ سوزىنە سۇيەنسەك، ۋتيلالىمدى الىپ تاستاۋدى قولدايتىندار الىم اۆتوكولىكتىڭ شىققان جىلىنا بايلانىستى وزگەرىپ تۇرادى دەپ اقپاراتتى دا بۇرا تارتىپ وتىر. «ەكىنشى قاتە اقپارات — ءۋتيلدىڭ 3 جىلدان اسقان كولىكتەرگە قىمبات ەكەنىنە قاتىستى. الىم باعاسى كولىكتىڭ شىققان جىلىنا ەمەس، ىشكى جانۋ قوزعالتقىشىنىڭ كولەمىنە عانا بايلانىستى (نەعۇرلىم جوعارى بولسا، سوعۇرلىم قىمبات).
شىققان جىلى باستاپقى تىركەۋ كەزىندە ەسكەرىلەدى:
- 2 جىلعا دەيىن بولسا — 923 تەڭگە
- 2-3 جىل اراسىندا بولسا — 184 600 تەڭگە
- 3 جىلدان اسسا — 1 846 000 تەڭگە.
روليك اۆتورى بوقايەۆ كومانداسى قوس ستاندارت ۇستاناتىن سىڭايلى دەيدى. سىننىڭ استىنا تەك ەكولوگيالىق الىم ءتۇسىپ جاتىر. ال باستاپقى تىركەۋ تۋرالى ايتىلا بەرمەيدى. ۋتيلالىمدى الىپ تاستاسا اۆتونارىقتا ۇلكەن وزگەرىس بولادى دەگەن تەزيس شىندىققا جاناسپايدى دەيدى قولدانۋشى.
«باستاپقى تىركەۋدى الىپ تاستاۋ تۋرالى تاقىرىپ جاناما عانا تالقىلانىپ جاتىر. بوقايەۆتىڭ ءوزى دە اسا ايتا بەرمەيدى. جاڭا كولىكتەرگە باستاپقى تىركەۋ سۋ تەگىن دەسە بولادى. 2-3 جىلدىقتارعا دا اسا جوعارى ەمەس. ال ەندى 3 جىلدان جوعارى كولىكتەرگە — وتە قىمبات. ەلدىڭ ءبارى جاڭا كولىككە ءمىنىپ جاتقان كەزدە شىققانىنا 3 جىلدان اسقان كولىكتىڭ قاجەتى بار ما؟ ۇرىلعان، سوعىلعان، ۇرلانعان كولىكتى اكەلۋدىڭ كەرەگى قانشا؟ ءارى مىنىلگەن كولىككە پايىزى از كرەديتتى ەشكىم بەرمەيدى»، — دەيدى روليك اۆتورى.
ۋتيليزاسيالىق الىم ماسەلەلەرىنە قاتىستى پەتيسيا قاراستىراتىن جۇمىس توبى جۇمىسىن جالعاستىرىپ جاتىر. دەلەگاسيا 27 ماۋسىم كۇنى قوستانايداعى ماشينا قۇراستىراتىن نىسانداردى ارالادى. جۇمىس توبىنا وسى جولى بۇعان دەيىن ەكى وتىرىسقا بارا الماي قالعان «نەت ۋتيلسبورۋ» قوزعالىسىنىڭ وكىلدەرى قوسىلدى. تاراپتار تاعى دا كەلىسىمگە كەلە المادى. جۇمىس توبىنىڭ وتىرىسى تىكەلەي ەفيردە كورسەتىلدى.
