– 2012 جىلى قاقاعان قىستىڭ ايازىندا كوڭىلىمىزگە سىزات ءتۇستى. ول – وتان قورعاعان باۋىرلارىمىزدىڭ ۇشاق اپاتىنان مەزگىلسىز قازا بولۋى ەدى. «تۋماق سۇننەت، ءولۋ پارىز»، سول ءولىم ەرتەلى كەش بار ادامنىڭ باسىنا كەلەتىنى شىندىق. قامشى سابىنداي قىسقا عۇمىردا حالقىنا ادال ەڭبەك ەتىپ، ارتقى ۇرپاققا جەمىسىن قالدىرعان دارابوزدار قانشاما؟ «ءوتاندى ءسۇيۋ يماننان» دەگەن اتالى ءسوز ۇلتتىڭ اماندىعىن، ەلدىڭ تىنىشتىعىن ساقتاۋدا ات ۇستىندە ۇيىقتاماي ۇلتىنا قورعان بولاتىن ازاماتتارعا قاراتا ايتىلعان بولسا كەرەك. سونداي ازاماتتارىمىزدان مەزگىلسىز ايىرىلىپ قالامىز دەگەن كىمنىڭ ويىندا بولدى دەرسىز. بۇل قايعىلى وقيعانى 6-شى جىل قاتارىنان ەسكە الىپ وتىرمىز. سوڭعى دەمى قالعانشا ەلىم دەپ ەڭبەك ەتكەن باۋىرلارىمىزدىڭ جاندارى ءجانناتتا بولعاي! – دەدى باقىت ناسىرحان ۇلى.
ميتينگ بارىسىندا اۋدان باسشىسى مەن جيىنعا قاتىسۋشىلار، جاۋىنگەرلەر قازا بولعان شەكاراشىلاردىڭ ەسكەرتكىشىنە گۇل شوقتارىن قويدى. سونداي-اق، بوزداقتاردىڭ رۋحىنا ارنالىپ اس بەرىلىپ، قۇران باعىشتالدى.
ايتا كەتەيىك، 2012 جىلى 25 جەلتوقساندا ساعات 18:55 مينۋت وتكەن كەزدە، شىمكەنت قالاسىنىڭ اۋەجايىنان 20 شاقىرىم جەردە استانا-شىمكەنت رەيسىمەن ۇشقان قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ ۆەدومستۆولىق ۇشاعى قونار الدىندا اپاتقا ۇشىرادى.
ان-72 اۋە كەمەسىنىڭ بورتىندا ەكيپاجدىڭ 7 مۇشەسى، 20 اسكەري قىزمەتشى، سونىڭ ىشىندە قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتى ديرەكتورىنىڭ مىندەتىن ۋاقىتشا اتقارۋشى، پولكوۆنيك ستامبەكوۆ تۇرعانبەك مۇحامەتقالي ۇلى مەن ماقتاارال اۋدانىنىڭ 2037 اسكەري ءبولىمىنىڭ باستىعى، پودپولكوۆنيك شۋقانوۆ امانبەك پەردەشبەك ۇلى دا بولعان.
ماقتاارال اۋدانى اكىمىنىڭ باسپا ءسوز قىزمەتى
