قازاقى ورتادا تانىمال ارنانىڭ حابارلاۋىنشا شەتكە كەتكەن كاپيتالدى قايتارۋدا توقايەۆتىڭ توڭىرەگى تەحاستا ورنالاسقان تەحنولوگيالىق كومپانياعا كوز تىگىپ وتىر.
قازاق ازاماتى ەليسار نۇرماعامبەتوۆ جەتەكشىلىك ەتەتىن Black Ice AI كومپانياسى بارىمتا-سىرىمتامەن كەلگەن اكتيۆتىڭ ەسەپ-قيسابىن جاساپ، ونىڭ شىعۋ تەگى مەن اقىرعى ايالداعان جەرىن انىقتاۋمەن اينالىسادى.
جاساندى ينتەللەكت قاجىگەلدينگە قاراعاندا قاۋىرت قيمىلدايدى، ونىڭ ساياسي امبيسياسى جوق. توقايەۆ پەن ونىڭ توڭىرەگىنە اقىل ايتپايدى. قاتەلىكتەرىن كوزگە ءتۇرتىپ كورسەتپەيدى.
بىزگە جەتكەن مالىمەت بويىنشا كومپانيا جەتەكشىسى ەليسار نۇرماعامبەتوۆ استاناعا ارنايى كەلىپ، ەلىمىزدىڭ بارلاۋ قىزمەتىنە جاساندى ينتەللەكتىنىڭ مۇمكىندىكتەرىن تانىستىرعان.
باس پروكۋراتۋرا، قارجى مونيتورينگى اگەنتتىگى، ۇقك سەكىلدى قۇرىلىمدار شەتتەگى اكتيۆتى قايتارۋدا قوسىمشا كومەكتىڭ قاجەت بولارىن مويىنداپ وتىر.
قارجى سالاسىنداعى ۇرلىق-قارلىقتى جاساندى ينتەللەكتىنىڭ كومەگىمەن انىقتايتىن كومپانيانىڭ ارعى جاعىندا اقش پەن ۇلىبريتانيانىڭ بارلاۋ قىزمەتى تۇر.
Black Ice AI -عا جەتەكشىلىك ەتەتىن ەليسار نۇرماعامبەتوۆكە ءبىر كەزگى سرۋ اگەنتى Scott Uehlinger جاردەمدەسەدى. كومپانياداعى 15-كە جۋىق اناليتيك ءار جىلدارى اقش-تىڭ ءتۇرلى مەماگەنتتىكتەرى، سونىڭ ىشىندە ناسا-دا جۇمىس ىستەگەن.
بۇعان دەيىن Forbes جۋرنالىنا سۇحبات بەرگەن نۇرماعامبەتوۆ جاڭا قازاقستاننىڭ زاكازى بويىنشا شەتتەگى اكتيۆىن جاسىرعان ءبىرقاتار تۇلعانىڭ ءاميانىنا ۇڭىلگەنىن مالىمدەگەن.
– اقوردا تىم سىلبىر قيمىلداۋدا. ەسكى قازاقستاننىڭ وكىلدەرى اكتيۆىن جاسىرۋدىڭ ءتۇرلى تاسىلدەرىن بىلەدى. شيراق قيمىلداۋ قاجەت. شەتتەگى كاپيتالدى سوڭعى تيىنىنا دەيىن ەلگە قايتارۋ قۇر قيال. مۇنىڭ 10 پايىزىن قايتارساق تا ۇلكەن جەتىستىك، – دەيدى نۇرماعامبەتوۆ.
ايتۋىنشا، Black Ice AI اقشانىڭ تازالىعىن انىقتامايدى. بۇل ارنايى قىزمەت وكىلدەرىنىڭ جۇمىسى. جاساندى ينتەللەكت اكتيۆتىڭ كىمگە تيەسىلى ەكەنىن تاۋىپ بەرەدى. بىلايشا ايتقاندا، اتىن اتاپ، ءتۇسىن تۇستەيدى.
ايتالىق، قيانداعى كايمان ارالىندا ءاتى-جونى بەلگىسىز قازاق وليگارحىنىڭ «التىن ساندىعى» جاسىرۋلى جاتىر دەيىك. ول بولات وتەمۇراتوۆقا تيەسىلى بولۋى مۇمكىن (شارتتى تۇردە). جاڭا قازاقستان الگى بايلىققا وتەمۇراتوۆ يەلىك ەتەرىن سەزسە دە، دالەلدەي الماي دال بولادى. مىنە، وسى كەزدە جاساندى ينتەللەكت كومەككە كەلەدى.
Black Ice AI-دىڭ اقش بيلىگىنىڭ الدىندا دا ابىرويى جوعارى.
كرەمل؟ مەمدەپ قازاق ازاماتى جەتەكشىلىك ەتەتىن كومپانياعا سانكسيالىق بارلاۋ جۇمىسىن جۇرگىزۋدى تاپسىرعالى وتىر. اقش سانكسياسىن اينالىپ ءوتىپ جاتقان رەسەيدىڭ ارەكەتى الداعى ۋاقىتتا قازاق ازاماتى ويلاپ تاپقان سوفتتىڭ نازارىنا ىلىگەدى.
ەندى ماعجانۇلىنا التەرناتيۆا تابىلعان سىندى. Tax justice network-تىڭ مالىمەتىنشە نازاربايەۆ كلانى وتكەن 30 جىلدا 140-160 ملرد دوللاردى وفشورعا شىعارعان.
