كەزدەسۋ بارىسىندا قوعامدىق دەنساۋلىق ساقتاۋ دەپارتامەنتىنىڭ باسشىسى گازەز سۋلەيمەنوۆ حالىققا شولپان اۋىلىندا جۇرگىزىلگەن زالالسىزداندىرۋ شارالارى جايلى جانە ءۇرجار اۋدانىداعى جالپىلاي ەپيدەميولوگيالىق جاعداي تۋرالى اقپارات بەردى. ءوز كەزەگىندە، وبلىستىق دەنساۋلىق ساقتاۋ باسشىسى مارات شورانوۆ تۇرعىندارعا باسقارمانىڭ باستاماسىمەن قارجىلىق-شارۋاشىلى پەن مەديسينالىق قىزمەت كورسەتۋ جۇمىستارىن تەكسەرۋ بويىنشا كوميسسيالار قۇرىلعانىن جەتكىزدى.
سونداي-اق، شولپان اۋىلىنا وبلىستىق پەدياتر، سەمەي قالاسىنان ينفەكسيالىق سىرقات بويىنشا مامان، ادىستەمەلىك كومەك كورسەتۋ ءۇشىن ارنايى جۇمىس توبىنان قۇرىلعان لابورانت ماماندار جىبەرىلدى.
– ءبىز دارىگەرلەرگە ادىستەمەلىك كومەك كورسەتەمىز، تۇرعىندارعا تۇسىندىرمە جۇمىستارىن جۇرگىزەمىز. بارلىق سىرقاتتانعان جانە اۋرۋدىڭ الدىن الۋ ءۇشىن سىرقاتتان امان بالالاردىڭ بارلىعىن قاراپ شىقتىق. قوسىمشا قاجەتتى ساراپتامالار دا جۇرگىزىلدى، – دەدى ينفەكسيالىق سىرقات مامانى ەلۆيرا يسابايەۆا.
كەزدەسۋ سوڭىندا جۇمىسىندا سالعىرتتىق تانىتقان باس دارىگەر جەكسەنباي تىلەۋبەرلين قىزمەتىنەن بوساتىلدى. ءوز سوزىندە جەكسەنباي تىلەۋبەرلين قاتەسىن تۇگەلدەي مويىنداپ، جىبەرگەن اعاتتىعى ءۇشىن حالىقتان كەشىرىم سۇرادى.
– اۋداندا ءقازىر تۇرعىندار تاراپىنان ناۋقاستاردى ءوز ەسەبىنەن تاسىمالداۋ ءۇشىن دارى-دارمەك جانە قىزدىراتىن جاقپا دارىلەر ساتىپ الۋ تۋرالى تۇسكەن شاعىمدار بويىنشا ارنايى كوميسسيا جۇمىس ىستەۋدە. مەديسينالىق كومەك كورسەتۋدىڭ زاماناۋي بولۋى مەن سايكەستىگى، ساپاسى جايلى تەكسەرىس جۇرگىزىلەدى – دەدى وبلىستىق دەنساۋلىق ساقتاۋ باسشىسى مارات شورانوۆ.
سىرقاتتان قايتىس بولعان قىزدىڭ اناسى اتا-انالاردان ناۋقاستاردى جەدەل جاردەم كولىگىمەن تاسىمالداۋ ءۇشىن، سونداي-اق، امبۋلاتوريالىق ەمدەۋ كەزىندە اقشا الىنعانى جايلى اقپاراتتى راستاپ وتىر.
– مەن قورىتىندى ساراپتامانى كۇتەمىن، رەسپۋبليكالىق كوميسسيا ناقتى دياگنوزدى انىقتاپ بەرسە دەيمىن. بۇدان بىلاي وسىنداي قاتەلىكتەردى بولدىرماۋ ءۇشىن كىنالىلەر ءوز جازاسىن الۋلارى ءتيىس. بۇل جەردە كىنا ءبىر عانا باس دارىگەردەن كەتكەن جوق. مەنىڭ قىزىما ۋاقىتىلى دۇرىس كومەك كورسەتىلمەدى،– دەدى جۋرناليستەرگە ومىردەن وتكەن قىزدىڭ اناسى ينديرا جانىبەكوۆا.
جوعارىدا ايتىلعان كوميسسيالار جۇمىسى 1 ايدىڭ ىشىندە اياقتالۋى ءتيىس جانە ونىڭ قورىتىندىسى جاريالاندى. ءبىر جىل كولەمىندە ءۇرجار اۋدانىنداعى بارلىق مەديسينالىق قىزمەتكەرلەرى قايتا اتتەستاسيالاۋدان وتپەك.
