ۇقشۇ-نى باسقارۋدى الماتىنى باسقارۋمەن شاتاستىرماڭىز، يمەكە!

Dalanews 11 قاڭ. 2023 03:11 613

وتكەن جىلدىڭ اياعىندا ۇجىمدىق قاۋىپسىزدىك شارتى ۇيىمىنىڭ (ۇقشۇ) باس حاتشىسى بولىپ تاعايىندالعان يمانعالي تاسماعامبەتوۆ قىزمەتىنە كىرىسەر ساتتە ايماقتاعى قاۋىپسىزدىكتى ساقتاۋدا ۇقشۇ-عا بالاما جوق ەكەنىن ايتتى، – دەپ حابارلايدى Dalanews.kz.

كۇنى كەشە عانا جاڭا قىزمەتىنە كىرىسكەن يمەكەڭ ۇيىمنىڭ مارتبەسىن اسىرىپ، ءوزىن وسى قىزمەتكە لايىق كورگەن مەملەكەت باسشىلارىنا العىس ايتتى.

– ۇقشۇ-عا مۇشە ەلدەردىڭ باسشىلارىنىڭ وسى جاۋاپتى قۇرىلىمدى باسقارۋدى ماعان سەنىپ تاپسىرعانىنا العىس ايتامىن. بۇگىندە الەم ءتۇرلى گەوساياسي جاعدايلارعا تاپ بولىپ، وتە ماڭىزدى ساياسي-ەكونوميكالىق ماسەلەلەرمەگ بەتپە-بەت كەلىپ وتىر.

بۇگىندە ۇقشۇ-نىڭ الدىندا وزەكتى وسى ماسەلەلەردى شەشۋ مىندەتى تۇر. ايماقتىق قاۋىپسىزدىككە قاتىستى سىن-قاتەرلەردىڭ تىگىسىن جاتىقىزۋدا ۇجىمدىق شارتى ۇيىمىنا ۇلكەن جاۋاپكەرشىلىك جۇكتەلۋدە. ايماقتاعى قاۋىپسىزدىك ماسەلەلەردى شەشۋدە ۇقشۇ-عا بالاما بولاتىن ۇيىم جوق، – دەدى تاسماعامبەتوۆ.


شىندىعىندا ۇقشۇ سوڭعى كەزدەرى ايماقتاعى قاۋىپسىزدىككە جاۋاپ بەرە المايتىن ءالجۋاز ۇيىمعا اينالعان. رەسەيدىڭ مۇددەسىنە جۇمىس ىستەيتىن ۇيىمدى ون جەردەن ماقتاساق تا ەندى ادام بولماسى انىق.

ايتالىق، ارمەنيا مەن ءازىربايجان، قىرعىزستان مەن تاجىكستان اراسىندا قارۋلى قاقتىعىس كەزىندە تاراپتاردى بىتىمگە كەلتىرە الماعان ۇيىمنان نە كۇتۋگە بولادى؟

وتكەن جىلدىڭ اياعىندا ۇقشۇ-نىڭ ارمەنيادا وتكەن باسقوسۋىندا ارمەنيا بيلىگى ۇقشۇ-دان شىققىسى كەلەتىندەرىن اشىپ ايتتى. ونى قاراپايىم ارمياندار دا قولداعانىن بىلەمىز.

ال مۇنىڭ الدىندا قىرعىزستاننىڭ پرەزيدەنتى سادىر جاپپاروۆ ۇيىمنىڭ پەتەربوردا وتكەن جيىنىنا بارماي، ۇقشۇ-نىڭ ءقادىرىن ودان بەتەر قاشىرىپ جىبەرگەنى ەسىمىزدە.


بۇگىندە رەسەي اسكەرىنىڭ ۋكراينا قارۋلى كۇشتەرىنەن ويسىراي جەڭىلۋى ۇقشۇ-نىڭ بولاشاعى بۇلىڭعىر ەكەنىن سوقىردىڭ قولىنا تاياق ۇستاتقانداي دالەلدەپ بەردى ەمەس پە؟

كەتەۋى كەتكەن ۇيىمعا تاسماعامبەتوۆ باسشى بولىپ سايلاعاننان تۇك وزگەرمەسى انىق. ۇقشۇ-نى باسقارۋ الماتىعا باسقارۋمەن جاساۋمەن شاتاستىرۋماڭىز، يمەكە!

كىم بىلەدى، يمەكەڭنىڭ ماڭدايىنا ۇقشۇ-نى تارقاتىپ، سوڭعى نۇكتەسىن قويۋ تاريحي ميسسياسى جازىلىپ قويعان دا شىعار؟..

ۇسىنىلعان
سوڭعى جاڭالىقتار