ۇقك جامبىل وبلىسىندا اسا ءىرى كولەمدە ەسىرتكى تاسىمالداعاندار مەن ساتقانداردى قۇرىقتادى، - دەپ حابارلايدى Dalanews.kz.
ۇقك مالىمەتىنشە، بيىل قازاندا ۇقك جامبىل وبلىسى بويىنشا دەپارتامەنتى پروكۋراتۋرا ورگاندارىنىڭ ۇيلەستىرۋىمەن قاتىسۋشىلارى ەسىرتكىنى اسا ءىرى كولەمدە تاسىمالدادى جانە ساتتى دەگەن كۇدىكپەن ەكى ەسىرتكى توبىنىڭ ارەكەتىنىڭ جولىن كەستى.
"ت.رىسقۇلوۆ جانە مەركى اۋداندارىندا 14 كگ-دان استام گاشيش پەن 42 كگ ماريحۋانانى ساتۋعا ارەكەتتەنگەن ەكى ادام ۇستالىپ، سوت سانكسياسىمەن قاماۋعا الىندى"، - دەپ جازىلعان حابارلامادا.
قىلمىستىق كودەكستىڭ 297-بابى 3-بولىگى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتقانى بەلگىلى بولدى.
ايتا كەتەيىك، بۇعان دەيىن الماتى وبلىسىندا پوليسيا ەسىرتكى زەرتحاناسىن جويعان بولاتىن.
“قاراسورا – 2024” جەدەل-پروفيلاكتيكالىق ءىس-شارا بارىسىندا ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى بەساعاش اۋىلىنىڭ ماڭىندا پسيحوتروپتىق زاتتاردى زاڭسىز ءوندىردى دەگەن كۇدىكتىنى ۇستادى. پوليسيا توقتاتقان كولىكتى تەكسەرۋ بارىسىندا جولاۋشىلار ورىندىعىندا 22 جاستاعى ەر ادام بولعان.
جەكە ءتىنتۋ بارىسىندا ودان ەرەكشە ءيىسى، ۇنتاق زاتى بار قارا پوليەتيلەن پاكەت تابىلىپ، تاركىلەندى.
پسيحوتروپتىق زاتتاردى زاڭسىز دايىنداۋ فاكتىسى بويىنشا قىلمىستىق ءىس قوزعالدى. كۇدىكتى قاماۋعا الىندى.
