ۇندىستەر بۇقتىرما سۋ قويماسى ۇستىنەن كوپىر سالادى

Dalanews 02 قار. 2017 03:27 378

ءۇندىستاننان كەلگەن ينۆەستورلار شىعىس قازاقستاننىڭ كۇرشىم اۋدانىنداعى بۇقتىرما سۋ قويماسىنا كوپىر سالۋعا ىنتا ءبىلدىردى. مەملەكەتتىك-جەكەمەنشىك سەرىكتەستىك نەگىزىندە «Shapoorji Pallonji Kazakhstan» كومپانياسى جوباعا قاراجات سالۋعا ءازىر ەكەندىكتەرىن جەتكىزدى.  

ەكەۋارا ىنتىماقتاستىق ماسەلەسىن شقو اكىمى دانيال احمەتوۆ پەن كومپانيا ديرەكتورى گوۋدحاما بۋدحار رامامۋرتي تالقىلادى. «Shapoorji Pallonji Kazakhstan» الەمدىك نارىقتاعى تاجىريبەسى مول كاسىپورىن، بۇگىندە الپىسقا جۋىق ەلمەن سەرىكتەستىك ورناتقان. ايتا كەتۋ كەرەك، ءوڭىر ءۇشىن ماڭىزدى كوپىردىڭ جوبالىق-سمەتالىق قۇجاتى دايىن. جالپى قۇنى 37،4 ملرد.تەڭگەنى قۇرايدى. ينۆەستورلاردان بولەك مەملەكەت تە اتالعان جوباعا قارجى قۇيۋعا دايىن.

– اسىرەسە، دەنساۋلىق ساقتاۋ سالاسىندا ۇلكەن تاجىريبەلەرىڭىزدىڭ بارى قۋانتادى. قولداعى كەيبىر جوبالار بويىنشا قاجەتتى قۇجاتتار دايىن، تانىسۋلارىڭىزعا بولادى. شارتتارى قاناعاتتاندىرسا، ەلىمىزدىڭ زاڭىنا سايكەس جۇمىس ىستەپ، جوبانى جۇزەگە اسىرۋعا كىرىسەيىك، - دەدى وبلىس اكىمى دانيال احمەتوۆ.

كەزدەسۋ سوڭىندا شقو اكىمدىگى مەن «Shapoorji Pallonji Kazakhstan» كومپانياسى اراسىندا ءوزارا ىنتىماقتاستىق تۋرالى مەموراندۋمعا قول قويىلدى. ونىڭ نەگىزىندە وسكەمەندە ۆينوگرادوۆ كوشەسى مەن سەمەي تاس جولى ارالىعىن ەرتىس ارقىلى جالعايتىن تاعى ءبىر كوپىر مەن ءوڭىردىڭ ءىرى ەكى قالاسىندا اۋرۋحانا سالۋ كوزدەلىپ وتىر.

ۇسىنىلعان
سوڭعى جاڭالىقتار